Փաստ ինֆո

Հատուկ քննչական ծառայությունը ստացել է Պետական վերահսկողական ծառայության՝ Ոստիկանությունում կատարած ուսումնասիրության նյութերը։ Այս մասին «Փաստինֆո»-ն տեղեկացավ ՀՔԾ մամուլի խոսնակ Մարինա Օհանջանյանից. «Դրանց վերաբերյալ հետագայում լրացուցիչ տեղեկություն կտրվի»,-նշեց նա։

Հիշեցնենք, որ մայիսի 23-ին ՊՎԾ-ն հայտարարություն էր տարածել, որում ասվում էր, որ 2019 թվականի մայիսի 7-ից սկսած Պետական վերահսկողական ծառայությունը ուսումնասիրություն է իրականացնում Ոստիկանությունում՝ կապված տրանսպորտային միջոցների հաշվառման համարանիշերի գնման գործընթացների հետ. «Ուսումնասիրությունների արդյունքում հայտնաբերվել են որոշակի խախտումներ»,-նշված էր հայտարարության մեջ։

Նույն օրը՝ լրագրողների հետ ճեպազրույցում, ՀՀ ոստիկանապետ Վալերի Օսիպյանը հայտարարել էր, որ Պետական վերահսկողության ծառայության պետի ԺՊ Արգիշտի Քյարամյանի ներկայացրած պարզաբանումը` ոստիկանությունում չարաշահումների հայտնաբերման վերաբերյալ, պոպուլիստական բնույթ է կրում. «Չկա և չի կարող նման բան լինել, Ոստիկանությունը թափանցիկ է գործում։»  Վալերի Օսիպյանն անհիմն էր համարել խոսակցությունները խախտումների մասին՝ նշելով, որ նրանք խոսում են ենթադրյալ մեղադրանքների մասին։

Օսիպյանն ասել էր, որ «ՊՎԾ մասին» ՀՀ օրենքի համաձայն` ՊՎԾ–ն վերահսկվող օբյեկտին, այս դեպքում՝ Ոստիկանությանը, պարտավոր էր ուսումնասիրության ավարտից հետո տեղեկանք տրամադրել։ Դրանից հետո վերահսկվողը պետք է կարծիք հայտներ, որից հետո միայն ՊՎԾ–ն պետք է իր հայտնաբերած հնարավոր խախտումների մասին տեղեկացներ վարչապետին։ ՀՀ վարչապետն էլ իր հերթին պետք է որոշեր, թե որ իրավական կառույցը պետք է զբաղվի այդ հարցով, եթե, իհարկե, խախտումներ եղել են։

Օսիպյանի այս հայտարարությանը ավելի ուշ անդրադարձել էր Պետական վերահսկողական ծառայությունը՝ ասելով, որ թեեւ ոստիկանապետն իր ճեպազրույցում, մեկնաբանելով «ՀՀ պետական վերահսկողական ծառայության մասին» օրենքը, թվարկել է որոշակի գործողությունների հաջորդականություն, որոնք պետք է պահպանվեն ծառայության ուսումնասիրությունների ընթացքում, սակայն վերջինս հաշվի չի առել ՀՀ քրեական քաղաքականությունից բխող մի կարևոր սկզբունք, այն է՝ առերևույթ հանցագործության հատկանիշներ պարունակող ցանկացած տեղեկատվություն պետք է ստուգվի քրեադատավարական ընթացակարգի միջոցով. «Սա ենթադրում է, որ պետական վերահսկողական ծառայությունը իր վերահսկողական գործառույթի իրականացման ընթացքում առերևույթ հանցագործության մասին վկայող տեղեկություններ հայտնաբերելիս ցանկացած պարագայում պարտավոր է այդ տեղեկությունները տրամադրել իրավապահ մարմնի։ Նշվածը թույլ է տալիս փաստել, որ ոստիկանապետն իր իրավական վերլուծությունը կատարել է բավականին նեղ իրավական տիրույթում՝ հաշվի առնելով միայն «ՀՀ պետական վերահսկողական ծառայության մասին» օրենքը, ինչի արդյունքում ճեպազրույցի ընթացքում ոչ պրոֆեսիոնալ դիրքորոշում է հայտնել»,-նշված էր հայտարարության մեջ։

Հեղինակ` Միլենա Խաչիկյան