Փաստ ինֆո

Քիչ առաջ ավարտվեց ցուցարարների հանդիպումը ԱԺ տնտեսական հարցերով մշտական հանձնաժողովի նախագահի հետ. «Պայմանավորվեցինք, որ հարցը նորից բերենք քննարկման»,-այս մասին լրագրողների հետ զրույցում քիչ առաջ ասաց Good Win ընկերության տնօրեն Սարգիս Միքայելյանը՝ նշելով, որ քննարկումը իրենց գոհացրեց. «Մեր բոլոր պահանջները լսեցին, եւ պրն Թունյանը խոստացավ, որ առաջիկայում դրանք կքննարկվեն»,-ասաց նա։

Լրագրողի այն դիտարկմանը, թե տեսակետ կա, որ նրանց պայքարը Vivaro-ների դեմ է, Սարգիս Միքայելյանն արձագանքեց՝ ասելով. «Մենք Vivaro-ների դեմ պայքարելու խնդիր չունենք, մենք պայքարում ենք մեր հիմնարկի աշխատանքային ընթացքի համար. եթե մեզ հնարավորություն չի տրվում էլեկտրոնային սարքավորումների միջոցով համակցված վիճակախաղ կազմակերպել, թեկուզ բացառապես բուքմեյքերական կետերի տիրույթում, մենք ստիպված ենք օրենքի ուժի մեջ մտնելուց տասնօրյա ժամկետում փակվել»։

Good Win ընկերության տնօրենը նշեց, որ հաշվի առնելով խաղամոլության հետ կապված անհանգստությունը՝ թե օրենսդիր եւ գործադիր իշխանությունների, թե ժողովրդի, 1.5 տարի հետո պատրաստ են փակվելու. «Ստեղծած իրավիճակի հետ հաշվի նստելով՝ այո, պատրաստ ենք, բայց այս պարագայում այս նախագիծը ծառայում  է այլ բանի, այսինքն՝ ովքեր ինտերնետ տիրույթում ուժեղ են, շարունակում են գործել, մենք փակվում ենք»,-ասաց Սարգիս Միքայելյանը։

Աղբյուր` Փաստինֆո