Փաստ ինֆո

«Ես չորս ժամ տեւած նիստից ավելին էի սպասում»,-այսօր լրագրողների հետ զրույցում այս մասին հայտարարեց ԱԺ փոխնախագահ Ալեն Սիմոնյանը՝ անդրադառնալով Դատավորների ընդհանուր ժողովի երեկ անցկացրած նիստին։

Լրագրողի այն դիտարկմանը, թե Ընդհանուր ժողովը ԲԴԽ-ին մեղադրել է անգործության մեջ, Ալեն Սիմոնյանն արձագանքեց.  «Մենք էլ ենք մեղավոր, միգուցե օր առաջ պետք է անեինք այն, ինչի մասին այսօր խոսում ենք, ուստի եկեք մեղավորներ չփնտրենք, այլ արձանագրենք, որ ՀՀ-ում լինելու է անկախ դատարան, որը ենթարկվելու է միայն ՀՀ ժողովրդին եւ օրենքին»։

Հարցին, թե ինչու սա եղավ Ռոբերտ Քոչարյանի գործով որոշումից հետո, Ալեն Սիմոնյանը պատասխանեց. «ԱԺ-ում մենք իշխանություն ենք վերջին 5 ամսվա ընթացքում, սակայն ԱԺ-ն, հանձնաժողովները իրենց բնականոն գործունեությունը լիարժեք սկսել են նոր, եթե դուք օրինակ եք բերում Քոչարյանի դեպքը, նրան մի անգամ էլ էին բաց թողել, բա ինչո՞ւ այն ժամանակ չսկսեցինք, շատ ու շատ գործեր կան, եւ պետք չէ նշել միայն Քոչարյանի գործի, դա երեւի ամենաաղմկահարույցն է, որովհետեւ նրա նկատմամբ մարդկանց վերամբերմունքը շատ ավելի վատն է, քան, ենթադրենք, Սերժ Սարգսյանի անվտանգության ղեկավարի նկատմամբ»։

Խոսելով ՍԴ նախագահ Հրայր Թովմասյանի հրաժարականի մասին՝ Ալեն Սիմոնյանն ասաց, որ դրա հասցեատերը ինքը չէ, ինքն իր կարծիքն արդեն հայտնել է թե ԲԴԽ, թե ՍԴ նախագահների մասին. «Հիմա նա հնարավորություն ունի ապացուցելու՝ որքանով է կապված  նախկին իշխանության եւ ՀՀ օրենքի հետ, կտեսնենք, թե ինչ որոշում կկայացնի»։

ԱԺ փոխնախագահը հիշեցրեց՝ իշխանության կրողը ՀՀ ժողովուրդն է, եւ եթե որոշում է կայացվում, որը ժողովրդի առնվազն մեծ մասին ջղայնացնում է եւ դուրս հանում փողոց, նշանակում է, որ դատական իշխանությունը չի սպասարկում ժողովրդին. «Եկեք չմոռանանք, որ դատական ողջ համակարգը ստեղծվել է նախկին իշխանությանը սպասարկելու համար, դուք բազմիցս խոսել ենք քաղբանտարկյալների մասին, եղել են բռնություններ եւ լրագրողների հետ կապված, եղել են վճիռներ, որ անգամ ձեր՝ լրագրողների մոտ են զարմանք առաջացրել, այդ դեպքում ինչու՞ է հիմա ձեզ մոտ զարմանք առաջացնում այն, որ դատական համակարգը, որ դա անպատիժ արել է, մեզ մոտ խնդիրներ է առաջացրել, եւ մենք փորրձում ենք դա ուղղել»։

Ի պատասխան լրագրողի այն հարցին՝ արդյո՞ք 2017 թվականի ՀՀ-ում ընտրությունները կեղծվել են, Ալեն Սիմոնյանը հայտարարեց. «1996 թվականից մինչեւ վերջին ընտրությունները չի եղել մի ընտրություն, որը ժողովրդի մոտ վստահություն է վայելել, եւ ես չեմ բացառում, որ այդ դեպքերով եւս գործեր կհարուցվեն, մի մոռացեք, որ ես այն մարդն եմ, ով ձեզ՝ լրագրողներիդ, խորհուրդ է տվել Սերժ Սարգսյանին եւ Ռոբերտ Քոչարյանին նախագահ չանվանել, որովհետեւ երբեւիցե Ռոբերտ Քոչարյանը չի հաղթել Կարեն Դեմիրճյանին կամ Ստեփան Դեմիրճյանին, եւ Սերժ Սարգսյանը չի հաղթել Լեւոն Տեր-Պետրոսյանին, առավել եւս՝ Րաֆֆի Հովհաննիսյանին։

ԱԺ փոխնախագահն ամփոփեց՝ ՀՀ-ում այնքան բան է տեղի ունեցել, որ քննիչները պարզապես չեն հարցնում. «Մենք նույնիսկ ավելացրել ենք քննիչների թիվը, որպեսզի այդ մարդիկ հասցնեն, այնպես որ չզարմանաք, որ մեկ տարի հետո 2017 թվականի կամ դրանից առաջվա ընտրությունների հետ կապված գործեր հարուցվեն, որեւիցե բանից չզարմանաք»,-ասաց նա։

Մանրամասները՝ տեսանյութում

Աղբյուր` Փաստինֆո