Փաստ ինֆո

Այսօր մենք տոնում ենք մեր հազարամյա պատմության ամենակարևոր իրադարձություններից մեկը՝ առաջին հանրապետության հիմնադրման օրը: 1918թ.-ի մայիսի 28-ին Ղարաքիլիսայի, Բաշ-Ապարանի, Սարդարապատի հերոսամարտերից հետո հռչակվեց Հայաստանի անկախ առաջին հանրապետությունը: Այսօր առաջին հանրապետության 101-ամյակի տոնի կապակցությամբ Սարդարապատ այցի ժամանակ ասաց ՀՀ վարչապետ Նիկոլ Փաշինյանը:

Նա նշեց, որ անկախացումը տեղի ունեցավ մի ժամանակաշրջանում, երբ թվում էր հայ ժողովրդի պատմությունը հասել է իր ավարտական փուլին:
‹‹Կիլիկիան Հայաստանի անկումից ուղիղ 500 տարի անց պետականություն չունեցող հայ ժողովուրդը ենթարկվել էր ծանրագույն մի աղետի՝ ցեղասպանության:

Մեկ ու կես միլիոն հայ սրի էր քաշվել, հարյուր հազարավորները դարձել էին փախստական և հայ լինելը ինքնին կյանքի համար վտանգավոր էր››,-ասաց ՀՀ վարչապետը:

Նրա խոսքով, թվում էր ստեղծված են բոլոր նախադրյալները, որ հայ ժողովուրդը հանձնվի իր պատմության առաջ, ճանաչի իր պարտությունը, կորցնի ինքնությունը, մոռանա իր պատմությունն ու հրաժարվի ապագայի նկատմամբ ունեցած որևէ հավակնությունից, բայց տեղի ունեցավ հակառակը, տեղի ունեցավ անսպասելին, և հայ ժողովուրդը ձեռք բերեց այն, ինչ թվում է կորցրել էր անդառնալիորեն:
‹‹Հայ ժողովուրդը ձեռք բերեց պետականություն, պետական դրոշ, զինանշան, օրհներք, որը արտահայտում էր մահվան եզրին հասած մեր ժողովրդի պատմական վորածննդի ողբերգական, բայց միևնույն ժամանակ հրաշափառ պատմությունը››,-նշեց Փաշինյանը:

Վարչապետը ներկաներին ասաց, որ այսօր նրանք կանգնած են սուրբ հողի վրա, քանի որ նաև այստեղ է հեղվել այն սուրբ արյունը, որով ապրելու և լինելու իրավունք է նվաճվել հայ ժողովրդի և նրա ինքնության համար:

‹‹Այս սուրբ արյան վրա է կառուցվել մեր պատմության առաջին հանրապետությունը և այստեղ հեղված սուրբ արյունն է ապացուցել, որ հայ ժողովուրդըկենսունակ, ապրելու ժողովուրդ է և նրա պատմության վերջակետ դնելու ցանկցած փորձ դատապարտված է ձախողման››,-ասաց ՀՀ վարչապետ Նիկոլ Փաշինյանը:

Մանրամասները՝ տեսանյութում:

Աղբյուր` Փաստինֆո