Փաստ ինֆո

Գագիկ Հարությունյանի՝յոթը մոր կաթ ուտող ֆենոմենին շատ անդրադարձներ են եղել:

Որպես տնտեսագետ իր կարիերան սկսած, նորանկախ Հայաստանում բարձր պաշտոններ զբաղեցրած՝ՀՀ փոխնախագահ, վարչապետի պաշտոնակատար, իսկ 1996-ից, այսինքն, ստեղծման օրից մինչև պաշտոնավարման ժամկետի ավարտը՝ 2018 թվականը ՍԴ նախագահի պաշտոնը զբաղեցրած, դրանից հետո էլ՝ ԲԴԽ նախագահի գահին բազմած Գագիկ Հարությունյանը այդպես էլ իրավաբան չդարձավ:

Այս դեպքում, նույնիսկ կարևորը դիպլոմը չէ, այլ՝ մեկ ընդհանուր գիլդիայի, համքարության անդամ լինելը: Նա իրեն, ըստ ամենայնի որևէ մասնագիտական հանրությանից դուրս և օրվա, պահի իշխանավորների, այլ խոսքով «ուժեղի» պարզ կամակատարը համարեց: Ընդամենը: Կարող էր, իրեն տրվա՛ծ էր որպես պրոֆեսիոնալ հեռանալու հնարավորությունը: Նա, սակայն, նախընտրեց ծառայամտությունը: Ասվածի վկայությունը ապացույց ունի, որի պարտակման պատմությունը օրերս բացահայտեց Դատավորների ընդհանուր ժողովը:

Պարզվում է՝ վերջին շրջանում՝ կապված հանրային հնչեղություն ունեցող գործերի հետ, երբ ՍԴ-ԲԴԽ իրավական ոլորտը ներկայացնող միավորներից մեկը, մասնավորաբար, ՍԴ-ն, Վճռաբեկ Դատարանի կայացրած որոշումների վերաբերյալ գնահատականներ էր տալիս՝ արձանագրելով մարդու իրավունքների խախտման դեպքերը՝ Վճռաբեկ դատարանը փորձել էր իրեն արդարացնել։ Մայիսի 16-ին 5 դատավոր գրություն են ստորագրել եւ ուղարկել ԲԴԽ՝ խնդրելով հրապարակել Քոչարյանի գործով իրենց կայացրած որոշումը, եւ արձագանքել ՍԴ որոշումներին ՎԴ-ին տրված գնահատականներին։ Բարձրագույն դատական խորհուրդը գրությունն ստացել է մայիսի 17-ին ու ոչինչ չի ձեռնարկել։ Ու հանկարծ մոտ մեկ շաբաթ անց՝ մայիսի 23-ին՝ իրեն ուղղված դատավորների ներքին գրությունը տեղադրվում է կայքում՝ որպես հայտարարություն։ Արդյունքում այն արժանացավ լուրջ քննադատության՝ իրավաբանական համայնքի կողմից, գնահատվեց եւ ընկալվեց դատական իշխանության նկատմամբ անթաքույց ճնշում գործադրող վարչապետին ծառայելու պատրաստակամության դրսեւորում վճռաբեկ դատարանի մի քանի դատավորների կողմից։

Սակայն պարզվում է նույն այդ գրության հեղինակների համար եւս անսպասելի է եղել իրենց նամակի հրապարակումը, քանի որ այն չի եղել հայտարարություն, այլ ընդամենը ակնկալել են ԲԴԽ-ից՝ իրենց տեր կանգնել ու հրապարակել իրենց որոշումը։
Գիտակցելով, որ գործող իշխանությունները ներկայումս թիրախավորել են ՍԴ-ն՝ Գագիկ Հարությունյանը հիշեց ՍԴ-ի հասցեին անթաքույց քննադատական խոսքեր պարունակող դատավորների նամակի մասին ու կայքում այն հրապարակվեց՝ թերեւս հույս ունենալով նման ծառայության մատուցմամբ պահպանել իր աթոռը։

Բայց չստացվեց, այս անգամ չստացվեց նրա խաղը՝ ամրագրելով անփառունակ նրա հեռացումը, անփառունակ վերջակետը:

Մարինե Մինասյան

Աղբյուր` Փաստինֆո