Փաստ ինֆո

2018 թվականին մեկը մյուսին հաջորդեցին տարբեր նախկին բարձրաստիճան պաշտոնյաներին առնչվող քրեական գործերի հարուցման մասին հաղորդագրությունները, սակայն դրանց հետագա ընթացքի մասին նույն պաշտոնական մարմինները որեւէ տեղեկատվություն՝ հանրությանը չեն տրամադրում՝ կարծես նման քրեական գործեր չեն էլ հարուցվել։

Դրանցից մեկը վերաբերում է ՀՀ երրորդ նախագահ Սերժ Սարգսյանին։ 2018 թվականի օգոստոսի 30-ին ՀՀ քննչական կոմիտեն հայտարարեց, որ «Կրեդիտ Երևան» բանկ ԲԲ ընկերության և «Լեվ Մարսեդ» ՍՊ ընկերության առանձնապես խոշոր չափերի արժեք ունեցող բաժնետոմսերը առերևույթ խարդախությամբ հափշտակելու դեպքի առթիվ ՀՀ ՔԿ ՀԿԳ քննության գլխավոր վարչության վարույթում քննվող քրեական գործով փաստական տվյալներ են ձեռք բերվել՝ գործադիր իշխանությունը ներկայացնող բարձրաստիճան պաշտոնատար անձանց կողմից առերևույթ պաշտոնեական լիազորություններն անցնելու և այլ հանցագործություններ կատարելու դեպքերի վերաբերյալ։ «Մասնավորապես՝ Լևոն Մարկոսը ցուցմունք է տվել, որ բանկը ձեռք է բերել ՀՀ բարձրաստիճան պաշտոնյայի կողմից արված առաջարկի հիման վրա։ Ընդ որում՝ նախքան գործարքը կնքելը, նրանից թաքցվել է բանկի իրական ֆինանսական վիճակը, անվճարունակ լինելը, որի մասին ներդրողը ռեալ պատկերացում է կազմել միայն բանկում և վերջինիս պատկանող գործարաններում ներդրումներ կատարելու ժամանակ։ Ավելին՝ բանկի իրական ֆինանսական վիճակը պարզելուց և այդ մասին բարձրաձայնելուց հետո Լևոն Մարկոսից պահանջվել է «Կրեդիտ Երևան» բանկին պատկանող անշարժ գույքերի մի մասը հանձնել բարձրաստիճան պաշտոնյային, ինչը մերժել է։

Դրանից հետո իր նկատմամբ սկսվել է ապօրինի քրեական հետապնդում, հայտարարվել է հետախուզում՝ Հայաստանի Հանրապետություն իր վերադառնալը կանխելու համար: Հետագայում տեղեկացել է, որ իր աշխատողներին ազատել են բանկից, իսկ բանկը և Հայաստանում իրեն պատկանող մի շարք անշարժ գույքեր` Երևանի Դերժինսկու անվան հաստոցաշինական գործարանը և երեք շուկաները, առանց իր գիտության, անհայտ պայմաններում օտարվել են։

ՀՀ քննչական կոմիտեի ՀԿԳ քննության գլխավոր վարչությունում քննվող քրեական գործով ձեռք բերված փաստական տվյալներում որպես գործարարի գույքն առանց նրա գիտության օտարելուն, սեփականությունը նրանից վերցնելուն առնչություն ունեցած անձանց թվում մատնանշվել է նաև ՀՀ բարձրաստիճան պաշտոնյա Սերժ Սարգսյանը»,- հայտնել էր ՔԿ-ն՝ նշելով, որ հարուցվել է քրեական գործ եւ ուղարկվել ՀՔԾ։

Քրգործի հարուցումից 7 ամիս անց «Փաստինֆո»-ն փորձեց ՀՔԾ-ից ճշտել՝ հիմնավորվե՞լ են արդյոք ընկերությունների բաժնետոմսերը խարդախությամբ հափշտակելու հանգամանքը, դրան գործադիր ընկերության պաշտոնատար անձանց առնչությունը, ինչպես նաեւ՝ առերեւույթ պաշտոնեական լիազորություններն անցնելու եւ այլ հանցագործություններ կատարելու հանգամանքները։ Նշված գործի շրջանակներում հարցաքննվել է արդյոք Սերժ Սարգսյանը, եթե այո, ապա՝ ինչ կարգավիճակով։ Խնդրել էինք նշել՝ քրեական գործով առաջադրվե՞լ են մեղադրանքներ, եթե այո, ապա՝ ում եւ որ հոդվածով։ Խնդրել էինք նշել նաեւ, թե ինչ փուլում է գործն այս պահին։

Նշված գրավոր հարցմանն ի պատասխան՝ ՀՔԾ-ն տեղեկացրել է, որ քրեական գործով նախաքննությունը շարունակվում է, և նախաքննության շահերից ելնելով` գործի վերաբերյալ  մանրամասներ չեն կարող հայտնել: Նկատենք, որ ՀՔԾ-ն հրաժարվել է նաեւ ասել քրեական գործով ընդհանրարպես մեղադրյալներ կան, թե ոչ։ Այդ հարցի պատասխանը եւս նախաքննական գաղտնիք է համարվել։

Նկատենք, որ բարձրաստիճան պաշտոնատար անձին առնչվող հանրային հնչեղություն ունեցող գործի մասին առաջինը խոսել են հենց իրավասու մարմինները. այն ժամանակ հայտարարվել էր, որ Մարկոսն ունի մեղադրյալի կարգավիճակ։ 7-8 ամիս անց այդ տեղեկատվությունը եւս համարվում է նախաքննական գաղտնիք։

Մեր տեղեկություններով՝ քրգործով Սերժ Սարգսյանին մեղադրանք չի առաջադրվել, անցած ամիսների ընթացքում ընդհանրապես նշված գործով որեւէ պաշտոնատար անձի մեղադրանք չի առաջադրվել, ուստիեւ «նախաքննության գաղտնիք» ասվածի տակ հանրությունից գաղտնի են պահվում քննության արդյունքները։

Աղբյուր` Փաստինֆո