Փաստ ինֆո

Հատուկ քննչական ծառայությունը ստացել է  Պետական վերահսկողական ծառայության՝ «Հայաստանի երիտասարդական հիմնադրամ»-ում կատարած ուսումնասիրության արդյունքները։ Այս մասին «Փաստինֆո»-ն տեղեկացավ ՀՔԾ մամուլի խոսնակ Մարինա Օհանջանյանից. «Նյութերը ստացել ենք մայիսի 24-ին՝ օրվա վերջ»,-նշեց Օհանջանյանը։

Հիշեցնենք, որ մայիսի 24-ին ՊՎԾ-ն հայտարարություն էր տարածել, որում ասվում էր, որ ՀՀ պետական վերահսկողական ծառայությունում ավարտվել է «Հայաստանի երիտասարդական hիմնադրամ»-ում իրականացված ուսումնասիրութունը, ինչի առարկա են դարձվել Հիմնադրամի ֆինանսական մուտքերի օրինականությունը և դրանց օգտագործման արդյունավետությունը. «Ուսումնասիրության արդյունքում վերհանված տեղեկություններում հանցագործության հատկանիշների առկայության հանգամանքը ստուգելու նպատակով՝ նյութերն ուղարկվել են ՀՀ հատուկ քննչական ծառայություն»,-նշված էր հայտարարության մեջ։

Ավելի վաղ հայտնել էինք, որ «Հայաստանի երիտասարդական հիմնադրամ»-ի վերաբերյալ մի գործ արդեն գտնվում է դատարանում։ Բանն այն է, որ 2018թ. մայիսի 25-ին ՀՀ քննչական կոմիտեում ստացվել էր «Հայաստանի երիտասարդական հիմնադրամ»-ի հոգաբարձուների խորհրդի անդամ, ԱԺ նախկին պատգամավոր Կարեն Ավագյանի դիմումն այն մասին, որ ապրիլի 6-ին «Հայաստանի Երիտասարդական հիմնադրամ»-ի գործադիր տնօրենը հիշյալ հիմնադրամի անունից ինքն իր հետ կնքել է 326.000.000 ՀՀ դրամի փոխառության պայմանագիր: Դիմումի հիման վրա նախապատրաստված նյութերի արդյունքներով հարուցվել էր քրեական գործ՝ ՀՀ քրեական օրենսգրքի 179-րդ հոդվածի 3-րդ մասի 1-ին կետով։ Նախաքննության ընթացքում իրականացված մեծածավալ քննչական գործողությունների արդյունքում պարզվել էր իրականացված յուրացումների և փողերի լվացման մեխանիզմը: Ապրիլի 30-ին հայտնի էր դարձել, որ գործով նախաքննությունն ավարտվել է եւ այն՝ մեղադրական եզրակացությամբ, ուղարկվել է դատարան։

Հեղինակ` Միլենա Խաչիկյան