Փաստ ինֆո

ՀՀ վարչապետ Նիկոլ Փաշինյանի կինը՝ Աննա Հակոբյանը, այսօր հայտարարել է, որ իրենց որդին՝ Աշոտը, զինվոր ընկերների հետ միասին եկել է Երևան համապատասխան զորամասում վերապատրաստումների:

Նա նշեց, որ Աշոտի Երևանում գտնվելը ժամանակավոր բնույթ է կրում և նա կրկին վերադառնալու է Արցախ:
‹‹Աշոտը շարունակելու է ծառայությունը, սա միակ դեպքը չէ: Առաջիկա դեռ մի տարի Աշոտը պետք է ծառայի, ենթադրում եմ՝ գուցե այդ մեկ տարվա ընթացքում նորից լինեն տարբեր զորամասեր, որովհետև դա ընդունված է. բոլոր զինվորները մասնակցում են, դա սովորական երևույթ է››,-ասաց ՀՀ վարչապետի կինը:

Աննա Հակոբյանն ընդգծեց, որ իրենց որդին ծառայում է այնպես, ինչպես ցանկացած զինվոր, և որևէ կերպ նրա ծառայությունը չի տարբերվում մյուս զինվորներից:

Հարցին, Երևանում գտնվելու ժամանակ Աշոտը տուն գնացե՞լ է՝ Հակոբյանը պատասխանեց, որ որդին օրենքով սահմանված կարգով ունեցել է արձակուրդ և մեկ օր անցկացրել է տանը:

Նշենք, որ Աշոտ Փաշինյանի Երևան տեղափոխվելու կապակցությամբ ՀՀ Պաշտպանության նախարարության մամուլի խոսնակ Արծրուն Հովհաննիսյանը ֆեյսբուքյան իր էջում գրառում էր կատարել և նշել, որ ՀՀ ԶՈւ-երի ցանկացած զինծառայող տարբեր ժամանակներում, տարբեր վայրերում մասնակցում է տարբեր հավաքների, քննությունների ու զորավարժությունների:

Հեղինակ` Սոնա Գեւորգյան