Փաստ ինֆո

Այսօր ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի արտահերթ նիստի ժամանակ հանձնաժողովի նախագահ Մխիթ Հայրապետյանն անդրադարձավ ՀՀ երկրորդ նախագահ Ռոբերտ Քոչարյանի գործով դատավոր Ալեքսանդր Ազարյանի հայտարարությանը, որ Ազգային ժողովում երեկվա երեխաները պետք է քննեն իր հարցը:

Հայրապետյանը նշեց, որ ըստ էության Ազարյանը նկատի է ունեցել իրենց հանձնաժողովի պատգամավորներին և կարծում է՝ նաև իրեն:
‹‹Կարծում եմ հարգարժան դատավորը որևէ կասկած չունի, որ ես առնվազն նույն ոճով կարող եմ պատասխանել իրեն, եթե հետևում է իմ քաղաքական գործունեությանը, բայց ես զերծ կմնամ այդ մակարդակի դաշտ տեղափոխվելուց››,-ասաց Հայրապետյանը:

Նա հույս հայտնեց, որ հետագա հայտարարություններում թե՛ Ազարյանը, թե՛ մյուս դատավորները ուղղակի կհիշեն դատավորի էթիկայի մասին:
Հայրապետյանի կարծիքով, նման օրինակ հայտարարությունները ոչ թե առանձին պատգամավորների, այլ խորհրդարանի նկատմամբ է անարգանք:
Հանձնաժողովի նախագահն ընգծեց, որ իր՝ նույն ոճով չպատասխանելը, խոսքում է ոչ թե դատավորի նկատմամբ ունեցած բացառիկ մեծ հարգանքի, այլ տվյալ դատավորին ներկայացնող ինստիտուտի նկատմամբ հարգանքի մասին:

‹‹Անկախ իմ անձնական ‹‹սիմպատիաներից›› ես պարտավորված եմ ինձ զգում հարգալից վերաբերմունք դրսևորել այդ կառույցի նկատմամբ: Հետևաբար հույս ունեմ, որ հետագայում դատական իշխանության ներկայացուցիչները իրենց խոսքում առավել նրբանկատ և հավասարակշռված հայտարարություններով հանդես կգան, որովհետև անարգում են պառլամենտարիզմը››,-ասաց Հայրապետյանը:

Նա նշեց, որ յուրաքանչյուր դատավորի յուրաքնաչյուր հայտարարություն ուղղակիորեն կարող է ստվերել մյուս դատավորների և դատական համակարգի բարի համբավը և հորդորեց զերծ մնալ հետագայում նմանօրինակ վիրավորական հայտարարություններից:

Հեղինակ` Սոնա Գեւորգյան