Փաստ ինֆո

Ինչպես հայտնի է, Բարձրագույն դատական խորհրդի նախագահ Գագիկ Հարությունյանը երեկ հրաժարականի դիմում էր ներկայացրել՝ նշելով, որ իր հետագա պաշտոնավարումն այլեւս նպատակահարմար չի գտնում։ Ավելի ուշ հրավիրվել էր նիստ, որի ընթացքում արձանագրել էր հրաժարական ներկայացնելու փաստը եւ Գագիկ Հարությունյանի լիազորությունները համարել դադարած։ ԲԴԽ նախագահի պարտականությունների կատարումը «ՀՀ դատական օրենսգիրք» սահմանադրական օրենքի 84-րդ հոդվածի 13-րդ մասով նախատեսված կարգով վերապահվել էր տարիքով ավագ անդամին՝ Գևորգ Դանիելյանին։

Նշենք, որ համաձայն ՀՀ սահմանադրության 174-րդ հոդվածի՝ Բարձրագույն դատական խորհուրդն ունի 10 անդամ, որից 5-ը ընտրվում է Դատավորների ընդհանուր ժողովի, 5-ը՝ Ազգային ժողովի կողմից։ Ընդ որում, նույն հոդվածի համաձայն՝ Ազգային ժողովի կողմից ընտրված անդամը չի կարող լինել դատավոր. Գագիկ Հարությունյանը ԲԴԽ անդամ էր ընտրվել ԱԺ քվոտայով՝  2018 թվականի մարտի 5-ին, հետագայում արդեն ԲԴԽ անդամների կողմից ընտրվել նախագահ։

Այսինքն՝ ԲԴԽ  նոր անդամի թեկնածուի հարցը դարձյալ վերապահված է ԱԺ-ին։

«Փաստինֆո»-ն ներկայացնում է օրենսդրական այն ընթացակարգը, որ սահմանված է ԲԴԽ անդամի, ապա նաեւ՝ նախագահի ընտրության համար։

ԱԺ կանոնակարգ օրենքով սահմանվում է ԲԴԽ անդամների ընտրության կարգը։ Ըստ դրա 144-րդ հոդվածի՝

1. Բարձրագույն դատական խորհրդի անդամի ընտրությունն անցկացվում է Ազգային ժողովի կողմից ընտրված  Բարձրագույն դատական խորհրդի անդամի՝

ա. լիազորությունների ավարտից ոչ շուտ, քան երեք ամիս առաջ, և ոչ ուշ, քան մեկ օր առաջ.

բ. պաշտոնը թափուր մնալուց հետո՝ եռամսյա ժամկետում

2. Բարձրագույն դատական խորհրդի անդամի պաշտոնում մեկական թեկնածու առաջադրելու իրավունք ունեն խմբակցությունները: Թեկնածուն առաջադրվում է խմբակցության որոշմամբ: Որոշման մեջ նշվում են Բարձրագույն դատական խորհրդի անդամի թեկնածուի եւ նրան ներկայացնելու իրավասություն ունեցող խմբակցության ներկայացուցչի անունները, ազգանունները: Որոշմանը կցվում են Սահմանադրությամբ եւ օրենքով սահմանված պահանջների ապահովումը հավաստող փաստաթղթերը: Սահմանադրության կամ օրենքի պահանջներին չհամապատասխանելու դեպքում Ազգային ժողովի նախագահը որոշումը եւ դրան կից ներկայացված փաստաթղթերը երկու աշխատանքային օրվա ընթացքում վերադարձնում է խմբակցությանը` նշելով պատճառների մասին:

Նշենք նաեւ, որ թեկնածուների առաջադրման եռամսյա ժամկետի լրանալուց հետո արդեն՝ 24 ժամվա ընթացքում, Ազգային ժողովի նախագահը հանդես է գալիս Բարձրագույն դատական խորհրդի անդամի թեկնածուի, ինչպես նաև՝ ընտրության անցկացման օրվա և ժամի մասին հայտարարությամբ:

«Հայաստանի Հանրապետության դատական օրենսգրքի» համաձայն՝ ԲԴԽ նոր նախագահի ընտրությունը կատարվում է ԲԴԽ անդամի թափուր տեղը համալրվելուց հետո` տասնօրյա ժամկետում:

Առաջադրված թեկնածուի ընտրությունն արդեն կարգավորվում է «Դատական օրենսգրքի» 84-րդ հոդվածով, որի համաձայն՝ նախագահի ընտրության համար գաղտնի քվեարկվում են համապատասխանաբար Ընդհանուր ժողովի կամ Ազգային ժողովի կողմից ընտրված բոլոր անդամների թեկնածությունները: ԲԴԽ նախագահն ընտրվում է ԲԴԽ անդամների ընդհանուր թվի ձայների մեծամասնությամբ: 

Հեղինակ` Միլենա Խաչիկյան