Փաստ ինֆո

Երբ կլինեն հստակ նշված, թե ինչ է իրենից ներկայացնում վեթթինգը ու երբ կհստակեցվեն Ազգային անվտանգության ծառայության գործառույթներն այդ գործընթացում՝  ԱԱԾ-ն միաշանակ կիրականացնի դրանք: Այսօր լրագրողների հետ զրույցում ասաց ԱԱԾ պետ Արթուր Վանեցյանը՝ անդրադառնալով դատավորներին վեթթինգի ենթարկելու նախաձեռնությանը:

Հարցին, արդյո՞ք միայն դատավորները պետք է վեթթինգի ենթարկվեն՝ Վանեցյանը կարեւորեց, որ հասարակության շրջանում չմնան կասկածներ որևէ պետական պաշտոնյայի կապերի, անցյալի գործունեության օրինականության, ունեցվածքի և այլնի մասին:

‹‹Դա կկոչվի վեթթինգ, թե այլ բան՝ կհստակեցվի, բայց պետք է հասարակության շրջանում բոլոր կասկածները փարատվեն թե պաշտոնատար անձին որտեղից ունեցվածքը, նրա նշանակման պատմությունը, թե ինչպես նշանակվեց››,-ասաց Վանեցյանը:

Լրագրողի դիտարկմանը, որ մամուլում բազմաթիվ հրապարակումներ կան՝ կառավարությունում խնամի, ծանոթ, բարեկամ կապերով նշանակումներ մասին՝ Վանեցյանը պատասխանեց. «Դրանից ելնելով էլ ասում եմ, որ անհրաժեշտություն կա հասարակությանը հուզող հարցերին պատասխան տալ»:

Հարցին, թե վարչապետի հայտարարություններից հետո ԱԱԾ-ն որևէ գործողություններ իրականացնո՞ւմ է դատավորների հետ կապված՝ Վանեցյանը պատասխանեց, որ ԱԱԾ-ում ‹‹դոսյե›› չկա, անհրաժեշտության դեպքում իրականցվում են օպերատիվ հետախուզական միջոցառումներ, անկախ նրանից այդ անձը կլինի դատախազ, ԱԱԾ-ական, շարքային քաղաքացի, թե նախարար։

Աղբյուր` Փաստինֆո