Փաստ ինֆո

Պետք է արձանագրել, որ կրոնի ազատությունը ամենակարևոր ազատություններից մեկն է, որովհետև գոնե ես համոզված եմ, որ մարդն Աստծուն հավատալով առաջին հերթին հավատում է ինքն իրեն: Այսօր կրոնի ազատության հիմնախնդիրներին նվիրված համաժողովին ասաց ՀՀ վարչապետ Նիկոլ Փաշինյանը:

Նա նշեց, որ իր պատկերացմամբ կրոնի ազատությունը և Աստծուն հավատալու ազատությունն առաջին հերթին յուրաքանչյուր մարդու ինքն իրեն հավատալու ազատությունն է:

«Իհարկե, ժամանակակից աշխարհում և դրանից առաջ էլ կան մարդիկ, ովքեր իրենք իրենց հավատում են ընդհակառակը ՝ Աստծուն չհավատալով, բայց միևնույն է այս պարագայում էլ մարդն ինքն իրեն հավատալու գործընթացում առանցքային դերակատար է դարձնում մարդուն»,-ասաց Փաշինյանը:

ՀՀ վարչապետի խոսքով, կրոնի ազատությունը մարդու ազատությունն է և կրոնի նկատմամբ մարդու ազատությունն ամենակարոր ազատություններից մեկն է:

«Ես ուրախ եմ նշել, որ Հայաստանի Հանրապետությունը մի երկիր է, որը իսկապես հետամուտ է կրոնի, համոզմունքի, հավատքի ազատությանը, խղճի ազատությանը»,-ասաց վարչապետը:

Փաշինյանն ընդգծեց, որ նոր Հայաստանն առավել ևս լիարժեք հավատարիմ է այս արժեքներին: Վարչապետի կարծքով, այն, որ այսօր Հայաստան ազգային և տվյալ համատեքստում կրոնական փոքրամասնությունները իրենց լիարժեք են զգում, դա իր ասածի կարևորագույն ապացույցներից մեկն է:

«Ուզում եմ ասել, որ մեզ համար սա սկզբունքային հարց է, որ ազգային, կրոնական փոքրամասնությունները Հայաստանում պետք է երաշխավորված լինեն, իրենց զգան լիարժեք, իրենց ինքնությունը պահպանելու, զարգացնելու և իրենց ինքնությամբ հպարտանալու հնարավորություն պետք է ունենա»,-ասաց Փաշինյանը:

Վարչապետը նշեց՝ երկար ժամանակ ընդունված է եղել մտածել, որ կրոնն ու կրոնական պատկերացումների տարբերությունները բաժանում են մարդկանց իրարից:

«Բայց մենք այս իրավիճակը բավականին տարօրինակ ենք համարում, նաև այն բերումով, որ ամենատարածված կրոնների մեծ մասն, ըստ էության, բխում են միևնույն Աստծուց»,-ընդգծեց ՀՀ վարչապետը:

Փաշինյանի կարծիքով, այս հանգամանքը ստիպում է ասել, որ բաժանարար գծերը ոչ թե կրոններն են ստեղծում, այլ դրանց մեկնաբանությամբ զբաղվող մարդիկ:

«Մեր հավատքն ու համոզմունքն այն է, որ կրոնը իրականում մարդկանց միավորելու, խաղաղություն և ներդաշնակություն հասնելու, երջանկության հասնելու և մարդկանց օգնելու  համար է»,-ասաց վարչապետը:

Նա համաժողովի մասնակիցներին մաղթեց «դուխով» հետամուտ լինել, իր խոսքով, այս բարդ հարցերի լուծմանը:

Աղբյուր` Փաստինֆո