Փաստ ինֆո

Հատկապես մեծ հիմնարկի ղեկավարը ժամանակից շուտ հեռանալիս պետք է խոսի այն հաջողությունների, անհաջողությունների մասին, որ ինքն է ունեցել և ոչ թե փորձի ուրիշներին ինչ-որ բաներում մեղադրել:Այսօր լրագրողների հետ ճեպազրույցում ասաց Կրթության և գիտության նախարար Արայիկ Հարությունյանը՝ անդրադառնալով Երևանի պետական համալսարանի նախկին ռեկտոր Արամ Սիմոնյանի հրաժարականին:

Նա նշեց, որ արժանապատիվ հեռանալը շատ լավ բան է, բայց այս դեպքում ինքը նման գործելաոճ չտեսավ:

Հարությունյանն ասաց՝ ցավում է, որ այդ որոշումը Արամ Սիմոնյանը շուտ չընդունեց և ԵՊՀ-ն ևս մի քանի տարով հետընթաց ունեցավ:

«Կարծում եմ մի փոքր խղճի խայթ է ունեցել, որ գոնե հիմա հրաժարական տվեց, որովհետև ակնհայտ է, որ նրա օրոք ԵՊՀ-ն նահանջ է ունեցել»,-ասաց ԿԳ նախարարը:

Հարությունյանը նշեց, որ ռեկտորի թափուր պաշտոնի համար թեկնածուի հարց առայժմ չի քննարկվել:

«Բուհերում բաց, թափանցիկ, բոլորի համար հավասար հնարավորություններով ընտրություններ են եղել, և ցանկացած ոք կարող է առաջադրվել ու հնարավորություն ունենա ընտրվելու»,-ասաց Հարությունյանը:

Աղբյուր` Փաստինֆո