Փաստ ինֆո

Ստեփանակերտում մի շարք կազմակերպությունների, կուսակցությունների ներկայացուցիչներ և անհատ գործիչներ, առաջնորդվելով ազգային֊պետական պատասխանատվությամբ, հանդես են եկել համատեղ հայտարարությամբ, որում մասնավորապես վերահաստատել են Արցախի՝ միացյալ Հայոց ինքնիշխան պետության անքակտելի, անօտարելի եւ լիիրավ մաս լինելը, ինչպես նաև Արցախում օրինավոր պետական իշխանություն հաստատելու իրենց քաղաքական վճռականությունը։ «Միացումը համազգային գերակա նպատակն է՝ Արցախի և ողջ Հայաստանի անվտանգությունն ու պետականակերտումը երաշխավորող օրակարգը» ֊ ասվում է հայտարարության մեջ։

Մենք ողջունում ենք համահայաստանյան քաղաքական կյանքի ժողովրդավարացմամբ պայմանավորված հանրային և քաղաքական ինքնակազմակերպման գործընթացները նաև Արցախում։ Հատկապես ոգևորիչ են Միացման հաղթական քաղաքական հայեցակարգին վերադառնալու հարաճուն գիտակցումը և կամքը, որը մեր դիտարկմամբ շատ ավելի լայն ընդգրկում ունի, և շուտով սույն հայտարարությունը ստորագրող շրջանակը զգալիորեն կարող է ընդլայնվել։

Տասնամյակներ շարունակ Հայաստանի քաղաքական վերնախավի կեղծիքով և սպառնալիքով հանրությանը պարտադրվել է Արցախը Հայաստանից առանձին ներկայացնելու ոչինչով չհիմնավորված և Արցախյան շարժման բուն նպատակի հանդեպ ուղակի դավաճանական բեմականացում, որի խայտառակ հետևանքներն են ազատագրված տարածքի մեծ մասի դեռևս ամայի լինելը, «հայաստանցի֊ղարաբաղցի» ազգապառակտման դրսևորումները, տարածքային զիջումների օրակարգով տարված բանակցությունները, արցախաբնակ ՀՀ քաղաքացիների սահմանադրական, ընտրական և այլ իրավունքների սահմանափակումները։

Հայ ժողովուրդը և պետությունը քայլեր են կատարում անկախացումից ու ազատամարտից ի վեր մեր անցած ուղին վերախմբագրելու, անցյալի վարչախմբերի աններելի սխալները շտկելու ուղղությամբ։ Այսօրվա Հայաստանում ժողովրդի կարծիքը արժևորված է ավելի քան երբեք։ Ուստի եկել է պահը միահամուռ և վճռական վերահաստատելու, որ Արցախը Հայաստանի հանրապետության անբաժան մասն է արդեն 30 տարի՝ ոչ միայն փաստացի, այլև իրավաբանորեն։ Հանրապետության հռչակումը և հանրաքվեն ԽՍՀՄ օրենքին համապատասխանեցնելու պատրվակով պարտադրված, ավելորդ և շփոթ ստեղծող գործողություններ էին, և ոչ մի կերպ չեն կարող մեկնաբանվել որպես անկախացում Հայաստանից։

Հրատապ անհրաժեշտություն է պետական և հանրային հարթություններում օր առաջ դադարեցնել բոլոր այն գործողությունները, որոնց համատեքստում ենթադրվում է, որ Արցախը առանձին պետություն է, առանձին ժողովրդով։ Արցախի հայաստանապատկանությանը հակասող և թյուրիմացություններ ստեղծող բոլոր մակարդակի իրավական ակտերը ենթակա են աստիճանական համապատասխանեցման ՀՀ Անկախության Հռչակագրին, դրա հիմքում դրված ու դեռևս խորհրդային ժամանակներում ընդունված՝ Արցախը Հայաստանի հետ միավորվելու պատմական որոշմանը, ինչպես նաև վերջինով պայմանավորված փաստացի իրողություններին։

«Հայկական ընտրություն» նախաձեռնությունը, տարիներ շարունակ փաստացի համակարգելով Միացման պայքարը, իր փորձագիտական կազմի ջանքերով պատրաստել է Միացման քաղաքական հայեցակարգի մանրամասն հիմնավորումները և վերոհիշյալ գործողությունների ճանապարհային քարտեզը։ Մոտ օրերին ևս մեկ անգամ դրանք կներկայացվեն հանրությանը Ստեփանակերտում և Երևանում։ Կից նաև կներկայացվեն «Հայկական ընտրության» առաջարկները Միացման ճանապարհային քարտեզի պետական առաջխաղացմանը օժանդակող քարոզչության, հանրային և քաղաքական քայլերի ժամանակացույցի, ինչպես նաև Արցախի առաջիկա տեղական ընտրություններում «Միացման» կողմնակիցների համատեղ մասնակցության գաղափարական֊ծրագրային և կազմակերպչական սկզբունքների վերաբերյալ։

Կեցցե միացյալ, ինքնիշխան և ազատ Հայաստանը

«Հայկական ընտրություն» նախաձեռնություն
22 մայիսի 2019թ.

Աղբյուր` Փաստինֆո