Փաստ ինֆո

«Քսայուղերի, բենզինի, նավթամթերքի համար տարեկան կտրվածքով 4% թանկացումն անընդունելի է։ Դա ծանր հետևանքներ կարող է ունենալ համապատասխան ոլորտների մրցունակության և առհասարակ բնակչության սոցիալական վիճակի վրա», - այս մասին Տնտեսական հանձնաժողովի նիստի ժամանակ ասաց ԼՀ խմբակցության պատգամավոր Արկադի Խաչատրյանը՝ ներկայացնելով «Հարկային օրենսգրքում» և հարակից օրենքներում փոփոխություններ կատարելու փաթեթի վերաբերյալ խմբակցության առաջարկները։

Պատգամավորի կարծիքով հարկային քաղաքականություն իրականացնելիս ամենակարևոր սկզբունքներից մեկն արտադրության գործոնների հարկման բեռի ավելացումից զերծ մնալն է։ Խոսքը ոչ միայն վերաբերում է հումքին, սարքավորումներին ու տեխնոլոգիաներին, այլև վառելիքին՝ մասնավորապես բենզինին, դիզելին, սեղմված բնական գազին։

«Լուսավոր Հայաստան» խմբակցությանը պատգամավորը վստահ է՝ արտադրության գործոնների հարկման բեռը չի կարելի ավելացնել. «Այդ գործոններից և վառելիքի բեռից է կախված տեղական արտադրողի մրցունակությունը»։ Պատգամավորի պնդմամբ սեղմված բնական գազի, բենզինի կամ դիզելի թանկացումն ուղղակիորեն ազդում են մարդկանց տնօրինման տակ մնացող եկամուտների վրա, ինչպես նաև տեղական արտադրողի մրցունակության վրա։

«Առաջարկում ենք ուշադիր լինել նաև մրցունակության առումով տեղական այն ճյուղերին, որոնք առաջնայինն են։ Մասնավորապես գինեգործությունը, ինչի ակցիզը նույնպես նախատեսում եք բարձրացնել», - ասաց պատգամավորը՝ նշելով, որ գինեգործությանը նոր զարկ հաղորդելու համար ակցիզի թանկացումը հասկանալի չէ։

«Մեր տեղեկություններով Վրաստանն ազատել կամ նվազեցրել է գինու ակցիզը, որպեսզի մրցունակ դարձնի արտադրությունը։ Նույնը մեր դեպքում է պետք կիրառել։ Ոչ միայն պետք չի բարձրացնել ակցիզը, այլև այն կիսով չափ նվազեցնել»։

Արկադի Խաչատրյանը ընդգծեց՝ անապահով մարդկանց կողմից սպառվող ցանկացած ապրանքի թանկացումն ուղղակիորեն հակասում է կառավարության հռչակած տնտեսական աճի և ներառականության ապահովման ծրագրային դրույթին, - «Ներառականություն ապահովելու համար պետք է խոցելի խավերի եկամուտներն ավելացվեն»։

Ֆինանսների նախարարի տեղակալ Արման Պողոսյանը վերապահումով համաձայնեց «Լուսավոր Հայաստան» խմբակցության պատգամավորի ներկայացրած սկզբունքին։ Վերջինս հստակեցրեց, որ դրույքաչափերը  որոշելիս ընդհանուր սկզբունք են ունեցել, - «Աչքաչափով չենք որոշել այս կամ այն ապրանքի դրույքաչափը»։

Արման Պողոսյանը մասնավորապես նշեց, որ ալկոհոլային խմիչքների մասով ընդհանուր ռեֆորմ են առաջարկում, - «Թվում է՝ բարձրացնում ենք գինու ակցիզը, բայց բարձրարժեք գինիների համար էժանացնում ենք, ցածրարժեքի համար ենք բարձրացրել։ Դա հնարավորություն է տալիս, որ ցածրարժեք, անհայտ ծագման գինիները շուկայում չհայտնվեն»։ Ֆինանսների նախարարի տեղակալը, խոսելով մրցունակության մասին, կարևորեց այն, որ թունդ ալկոհոլային խմիչքների ակցիզը 6-7 անգամ ավելի շատ է բարձրանում, քան գինունը։ Հետևաբար գինին ստանում է մրցակցային առավելություններ։

Աղբյուր` Փաստինֆո