Փաստ ինֆո

Կառավարության նիստերը հոգեբանական բավական հետաքրքիր նյութ են պարունակում: Տեսախցիկը ռենտգենի նման է՝ ոչ միայն արձանագրում է բարձրաձայն ասվածը, եթե մարդը լուռ է անգամ՝  ժեստերի և  հայացքի, աչքերի  միջոցով նրա  հույզերը շատ պարզորոշ են  փոխանցվում: Վերջին նիստի ընթացքում տեսախցիկը ֆիքսել էր նիստի ժամանակ կողք-կողքի նստող  երկու պաշտոնյաների՝ Քաղաքաշինության կոմիտեի նախագահ Վահագն Վերմիշյանի և Կադաստրի կոմիտեի նախագահ Սարհատ Պետրոսյանի՝ մեկմեկու ուղղված  հայացքները:

Անդրադառնալով նոր կառավարության այս երկու պաշտոնյաների՝ նիստի ընթացքում  բարձր ձայնով հայտնած  մտքերին ու տեսակետներին, ինչպես նաև՝ թեմային՝ վարչապետի և փոխվարչապետ Ավինյանի անդրադարձներին, ընդհանրապես, խնդրո առարկա հայեցակարգին, հանգում ես այն եզրակացության, որ առաջիկայում հանձինս  Կադաստրի կոմիտեի՝ կունենանք հսկայական բազայի տիրապետող մի կառույց, ուր ներառված կլինեն  հատուկ ռեժիմային համարվող անտառների, բնության հատուկ պահպանվող տարածքների, ջրային տարածքների, պատմության և մշակույթի հուշարձանների , նաև՝ տնտեսական ներուժի մասով՝ ընդերքի, գյուղատնտեսության, ինչպես նաև՝ պլանավորման մասով՝ քաղաքաշինության և տրանսպորտի և այլ ենթակառուցվածքների վերաբերյալ տեղեկատվությունը, որը կսպասարկվի կադաստրի կոմիտեի միջոցով:

Այս համատեքստում էլ  նիստի ընթացքում պարզորոշ արտահայտվեց քաղաքաշինության և կադաստրի ոլորտները  ղեկավարող 2 պաշտոնյաների՝ Վահագն Վերմիշյան-Սարհատ Պետրոսյան  անհամաձայնությունների բնագծերը:

Մի փոքր նկատառում և մեծ անհամաձայնություն

Սարհատ Պետրոսյանի զեկույցից հետո քաղաքաշինության կոմիտեի նախագահ Վահագն Վերմիշյանը «մի փոքր նկատառում» ասելով խոսք խնդրեց՝   ներկայացնելով իր մեծ անհամաձայնությունը հայեցակարգի վերաբերյալ՝ այն համատեքստում, որ անշարժ գույքի կադաստրի վարման հիմնական նպատակը անշարժ գույքի առկայության և դրա նկատմամբ գրանցված իրավունքների սահմանափակումների վերաբերյալ տեղեկատվության ստացումն  ու քաղաքացիների սահամանափակումների գրանցումն է:

«Էս ինչ որ մեր կոլեգան հիմա թվարկեց, էս ամեն ինչը քաղաքաշինության կոմիտեի գործառույթներն են: Իմիջիայլոց, անշարժ հուշարձանները ևս  համարվում են քաղաքաշինական օբյեկտներ: Եվ մենք մեր գործառույթը չենք կարողանում իրականացնել մի պարզ պատճառով՝ քանի որ չունենք ամենակարևորը՝ չունենք կադաստր, որի վրա կարող ենք դա նստացնել: Հիմա,  փոխանակ մեր կոլեգան զբաղվի իր անմիջական գործով , այսինքն, կադաստրի կազմակերպմամբ, մտնում է ուրիշ գերատեսչությունների դաշտ»:

Այստեղ միջամտում է վարչապետը և կոռեկտության կոչում /ասֆալտին փռող, պատերին տվողն՝ ուրիշ վարչապետ է, չշփոթել/ Վերմիշյանին, նշելով, որ հարցը մինչ կառավարության օրակարգում ընդգրկվելը, անցել է նախարարական կոմիտեով:  Ի դեպ, այս կերպը կառավարության աշխատաոճի  բաղադրիչն է եղել նաև նախկինում, փոխանակ բոլոր հարցերի վերաբերյալ առաջարկություն-դիտողություն-անհամաձայնությունները մինչև կառավարության նիստը լուծվեն, աշխատանքային ռեժիմով հստակեցվեն, ոմանք գերադասում են հենց նիստի ընթացքում քննարկում ծավալել: Իհարկե, տարօրինակ բաներ էլ են պարզվում քննարկումների ժամանակ, օրինակ, ինչպե՞ս է ստացվում, որ երկու կոմիտեներից մեկը նախարարական կոմիտեի անդամ չէ, իսկ մյուսը՝ անդամ է: Այս հարցադրմանս ֆորմալ  պատասխանն էլ տվեց Փաշինյանը, թե՝ միևնույն է, եթե անդամ էլ լիներ քաղշինը, մեկ է, իր մեկ ձայնը որոշիչ չէր լինելու:  

Ուշագրավ է, որ   վարչապետի ֆորմալ բացատրությունները փոխվարչապետ Ավինյան իր խոսքով բովանդակային  հուն տեղափոխելով, հստակ շեշտադրմամբ նկատեց՝ ունենք կադաստրային քարտեզի  խնդիր, որը պիտի լուծենք, կադաստրի կոմիտեն նախաձեռնողականություն է ցուցաբերել, ինչը ողջունելի է: Ըստ նրա՝ քաղաքաշինական կոմիտեն շարունակելու է վարել քաղաքաշինական կադաստրը,  իսկ թե որ սերվերների վրա ենք պահելու, էական չէ: Կարևորը մեռյալ կետից շարժվելն էր:

Իհարկե քաղշին-կադաստր փոխհրաձգությունն այսպես չավարտվեց, Վահագն Վերմիշյանը շրջանցելով Ավինյանին՝ միանգամից վարչապետ Փաշինյանի հետ հանդիպում խնդրեց խնդրո առարկա թեմայով, վարչապետն էլ՝ խոստացավ այն առաջիկա օրերին կազմակերպել և հարկ եղած դեպքում՝  խորամուխ լինել, մինչև վերջին դետալը  հասկանալ՝ ինչն-ինչոց է:

Տեսնենք՝ թեման կթեժանա, թե՞ կմարի…

Հեղինակ` Մարինե Մինասյան