Փաստ ինֆո

«Ես անձամբ հանցագործության մասին որեւէ հաղորդում չեմ ներկայացրել, իրավական այլ գործողություն չեմ նախաձեռնել, ինչ որ եղել է, տեսանյութերում երեւում է»,-«Փաստինֆո»-ի հետ զրույցում այս մասին ասաց փաստաբան Միհրան Պողոսյանը՝ անդրադառնալով այն հայտարարությանը, թե ՀՔԾ-ն ստացել է դատարանների աշխատանքի սահմանափակման վերաբերյալ հինգ հաղորդում. «Մամուլի հրապարակումների հիման վրա իրենք իրենց նախաձեռնությամբ են դա արել»,-ասաց նա։

Բանն այն է, որ մայիսի 20-ին Միհրան Պողոսյանը նիստի է եղել Երևան քաղաքի ընդհանուր իրավասության դատարանի Կենտրոնի նստավայրում, սակայն դատարանի դիմաց հավաքված քաղաքացիները նրան թույլ չեն տվել մուտք գործել. «Իմացան, որ փաստաբան եմ, գործով եմ եկել, եւ թույլ չտվեցին ներս մտնել, ոստիկաններին կանչեցի, ասացի, որ նիստի եմ գնում, ինձ խոչընդոտում են, դե, ոստիկանները հասկանում էին, որ այդտեղ հանցագործություն է, եւ վտանգներ կան, ու ինձ հորդորում էին,  որ իմ անվտանգությունից ելնելով՝ հեռանամ այդ տարածքից»,-մեզ հետ զրույցում նշեց Միհրան Պողոսյանը։

Փաստաբանի խոսքով՝ այդ ամենն ուղեկցվում էր վիրավորական արտահայտություններով. «Եվ դա միայն նրա համար, որ ես փաստաբան եմ ու ուզում եմ իրականացնել իմ մասնագիտական գործունեությունը»։

Ամեն դեպքում, փաստաբանն ի վերջո կարողացել է մուտք գործել, եւ դատական նիստը ուշացումով կայացել է. «Երբ այդ ամբոխը ինքնակազմակերպվեց այլ գործողության հետ կապված, ես կարողացա ներս մտնել, եւ դատական նիստը տեղի ունեցավ 20-25 րոպե ուշացումով»։

«Փաստինֆո»-ն երեկ հայտնել է, որ Հատուկ քննչական ծառայությունը ստացել է դատարանների մուտքերն ու ելքերն արգեփակելուն ուղղված գործողությունների ընթացքում կատարված առերևույթ հանցագործության վերաբերյալ Դատախազության կողմից ուղարկված հինգ նյութերը՝ դրանց ընթացքը սահմանված կարգով լուծելու համար։ 

Հիշեցնենք,  որ մայիսի 19-ին ՀՀ վարչապետ Նիկոլ Փաշինյանը ֆեյսբուքյան իր էջում գրառում էր արել` կոչ անելով մյուս օրը` 08:30-ից, արգելափակել ՀՀ բոլոր դատարաններ ելքերն ու մուտքերը այնպես, որ ոչ ոք ներս չմտնի. «Իսկ 12:00-ին ձեզ հետաքրքրող բոլոր հարցերի պատասխանները կփորձեմ տալ եւ կհայտարարեմ մեր հետագա անելիքները»,-ասել էր նա:

Ժ. 12-ին վարչապետը խորհրդակցություն էր հրավիրել, որի ժամանակ հայտարարել էր դատական համակարգում vetting իրականացնելու մասին. «Հայաստանում գործող բոլոր դատավորները պետք է ենթարկվեն, այսպես ասած, vetting-ի: Այսինքն՝ հանրությունը պետք է ամբողջական տեղեկատվություն ունենա դատավորի ունեցած քաղաքական կապերի ու ծագումնաբանության, գույքային վիճակի, դատավորի կարգավիճակում եւ նախորդ շրջանում ծավալած գործունեության, անհատական եւ պրոֆեսիոնալ հատկանիշների մասին»,-նշել էր Նիկոլ Փաշինյանը:

Հեղինակ` Միլենա Խաչիկյան