Փաստ ինֆո

«Այս որոշումներից հետո լավագույն լուծումը պետք է լինի ցեմենտի գործարաններին ժամանակ տալը՝ ներդրումներ իրականացնելու, գործարանները վերակառուցելու և տեխնոլոգիաներ ձեռք բերելու համար», - «Փաստինֆո»-ի հետ զրույցում ասաց Հայաստանի գործատուների հանրապետական միության նախագահ Գագիկ Մակարյանը՝ անդրադառնալով ներկրվող ցեմենտի վրա պետական տուրք սահմանելու նախագծին։ Վերջինս ընդգծեց, որ գործարանների մոդեռնիզացման դեպքում կընդլայնվի ցեմենտի տեսականին,  - «Ավելի լավ է հայկական ցեմենտը մի քիչ ավելի թանկ լինի, քան ներմուծում ենք, բայց ունենանք մեր սեփական արտադրությունը ցեմենտի բնագավառում»։

Տնտեսագետը նկատեց, որ Հայաստանում կա երկու ցեմենտի գործարան և արտադրվում է միայն մեկ կատեգորիայի ցեմենտ այն դեպքում, երբ հարևան երկրներում արտադրվող ցեմենտի  տեսականին մեծ է։

«Այդ երկու գործարանն իրենցից տնտեսական ճյուղ են ներկայացնում, տնտեսական ոլորտ։ Դա ցեմենտի արտադրություն չէ միայն։ Դա ցեմենտի արդյունաբերություն է և, որը պետք է պահպանել»։

Գագիկ Մակարյանը խորհուրդ չի տալիս խաբնվել հարևան Իրանի ներկայիս դրությանը։ Այն, որ սանկցիաների պատճառով տնտեսական ակտիվությունն ընկել է, ազգային դրամն արժեզրկվել, չի նշանակում, որ  հավերժ կարող ենք Իրանից էժան ցեմենտ ներկրել։ Մի օր այնտեղ էլ  կարող է իրավիճակ փոխվել. «Պետք չէ կառուցել ժամանակավոր բնույթ ունեցող ռազմավարություն»։

Ներքին արտադրողին խրախուսելու հարցում Գագիկ Մակարյանը կարևորեց պետության գործոնը։ Անհրաժեշտ աջակցությունը կարող է դրսևորվել տարբեր թույլտվություններով ավելացված արժեքի հարկի, մաքսատուրքի հետաձգումից մինչև  սուբսիդավորում։

«Երկու ցեմենտ արտադրող գործարանների շուրջ հազարավոր փոքր ու միջին ձեռնարկություններ կան, որոնք տարբեր նյութեր մատակարարելով մասնակցում են գործընթացին», - ասաց գործատուների միության նախագահը՝ ավելացնելով, որ այդ գործարանների թուլանալու կամ վերանալու դեպքում իրենց գործունեությունը կդադարեցնեն նաև հազարավոր փոքր ու միջին ձեռնարկություններ։ Գագիկ Մակարյանը հարցի լուծումը պարզ հաշվարկներով չի տեսնում՝ անհրաժեշտ են տնտեսագիտական և սոցիալական հաշվարկներ։

Հեղինակ` Հասմիկ Կոշկարյան