Փաստ ինֆո

«Ես կարծում եմ, որ գործի կասեցումն ու Սահմանադրական դատարան ուղարկելու բոլոր գործողությունները իրավաչափ են, այսինքն՝ բխում են դատարանի կողմից նախնական որոշումներ կայացնելու իրավակարգավորումներից»,- «Փաստինֆո»-ի հետ զրույցում այս կարծիքը հայտնեց ՀԱՊԿ նախկին քարտուղար Յուրի Խաչատուրովի պաշտպան Միհրան Պողոսյանը։

Անդրադառնալով այն հարցին՝ արդյոք այդ որոշումը ենթակա է բողոքարկման, Միհրան Պողոսյանը նշեց, որ օրենսդրական  որեւէ  հստակ հիմք չկա, դատավորն առաջնորդվել է ՀՀ քրեական դատավարության օրենսգրքի 292-րդ հոդվածով. «Իմ՝ որպես իրավաբանի կարծիքով, 292-րդ հոդվածով կայացված որոշումները բողոքարկման ենթակա չեն, բայց ես որեւէ խնդիր չեմ տեսնում, թող բողոքարկեն, եւ Վերաքննիչ դատարանը սահմանի՝ արդյոք դրանք բողոքարկման ենթակա են թե ոչ»:

Պողոսյանի կարծիքով` գործի կասեցումը ճիշտ էր հատկապես այս փուլում. «Ես, օրինակ, միջնորդություն եմ ներկայացրել Յուրի Խաչատուրովի նկատմամբ քրեական  հետապնդումը դադարեցնելու պահանջով՝ հենց նույն՝ 300 եւ 300.1 հոդվածների հարաբերակցության հիմքով, եւ դատարանը իմ միջնորդության հետ կապված թեկուզեւ իմ պաշտպանյալի մասով չէր կարող գնահատական տալ, քանի դեռ չի լուծվել հոդվածների հարաբերակցության այդ հարցը»:

Փաստաբանը հիշեցրեց, որ խափանման միջոցի դատական նիստերին գնում էր,  որպեսզի իր այդ միջնորդությունը եւս քննարկվեր, բայց դատարանը հայտնել էր, որ գործով մյուս մեղադրյալները այդ նիստերին կողմ չեմ հանդիսանում. «Այլ հարց է, որ այս գործողությունները դուրս չեն գալիս Դատախազությանը, եւ վերջինս այժմ փորձում է ներկայացնել, թե իբր այդ միջնորդությունը պետք է քննարկվեր, բայց  այն պարագայում, երբ ես գնում ու նշում էի, որ այլ միջնորդություններ կան, որոնք եւս պետք է քննարկվեն, այդ ժամանակ նրանք, դեմ լինելով, նշում էին, որ սա զուտ խափանման միջոցի քննարկման հարց է»,-նշեց նա:

Ի պատասխան «Փաստինֆո»-ի այն հարցին, թե Վերաքննիչ դատարանի` բողոքը բավարարելու դեպքում ինչ կարող է լինել, փաստաբանը նշեց, որ կսկսվի գործի քննության չկանխորոշված գիծ. «Ես կարծում եմ, որ Վերաքննիչ դատարանը այս հարցով բողոքի քննարկում չի իրականացնելու: Առհասարակ, կողմ եւ դեմ բոլոր փաստարկները՝ ազատությունից զրկելու կամ չզրկելու հետ կապված, գործն իր վարույթում ունեցող դատարանն է որոշում, ուստի եթե Վերաքննիչը բավարարի բողոքը, մի փոքր ճիշտ չի լինի, որ Առաջին ատյանին ասի՝ քո վարույթում գտնվող գործով դու գտնում ես, որ անձը չի խուսափի քննությունից, ես գտնում եմ, որ կխուսափի, այսինքն՝ եթե անգամ Վերաքննիչը որոշի, որ այդտեղ սահմանադրականության հարց չկա, արդեն քրեական գործի քննության չկանխորոշված գիծ է սկսվելու, որը, կարծում եմ, ճիշտ չէ»:

Այս հանգամանքը, ըստ Միհրան Պողոսյանի, չի կարող հիմք հանդիսանալ, որ գործն այլ դատավորի մակագրվի. «Միգուցե դատավորը հիմքով, որ իր կասկածները չեն փարատվում եւ որ իրավական բոլոր մեխանիզմները սպառել է, ինքնաբացարկ հայտնի, ես չեմ բացառում»:

Միհրան Պողոսյանը ընգծեց նաեւ, որ այդ փաստարկներն Առաջին ատյանի մոտ արդեն արձանագրված են, եւ միակը, ըստ նրա, որ կարող է փարատել այդ կասկածները, Սահմանարական դատարանն է. «Չմոռանանք, որ Վերաքննիչ դատարանն էլ Ռոբերտ Քոչարյանի խափանման միջոցի հարցի քննության ժամանակ կոնկրետ անձի անձեռնմխելիության  հարցը  բարձրացրել է, ընդ որում, այդ դիրքորոշման հետ իր համաձայնությունը հայտնել է նաեւ Վճռաբեկ դատարանը՝ իր հատուկ կարծիքով, այսինքն՝ այս կասկածները վերջիվերջո պետք է փարատվեն»,-«Փաստինֆո»-ի հետ զրույցում ասաց փաստաբան Միհրան Պողոսյանը:

Հեղինակ` Միլենա Խաչիկյան