Փաստ ինֆո

ՀՅԴ այսօր կազմակերպած հանրահավաքը նախազգուշական էր: Այս մասին ասաց Հայ Յեղափոխական Դաշնակցության Բյուրոյի անդամ Արմեն Ռուստամյանը։ 

Նա նշեց, որ Հայաստանը մոտեցել է անշրջելիության կետին, որից հետո կորուստներն անդառնալի են լինում։

Ռուստամյանի կարծիքով, իշխանության վարած քաղաքականությունը ոչ միայն համահունչ չէ երկրի մարտահրավերներին և ժողովրդի սպասումներին, այլև գնալով առաջացնում են վտանգներ, նոր վտանգներ, և կուտակում է նոր խնդիրներ։

«Սա մի սպառնալիք է, որն այս ինքնագոհ և ինքնահավան իշխանությունը չի զգում ու չի էլ պատրաստվում դրա դեմն առնել, դրա համար եկել ենք ասելու լրջացե՛ք, դուրս եկեք այս ինքնասիրահարված և էյֆորիկ վիճակից»,-ասաց Արմեն Ռուստամյանը։

Նա նշեց՝ իշխանավարման մեկ ամյա հետևանքները ցույց են տալիս, որ սթափվելու պահն է։ Ռուստամյանի կարծիքով,այլևս ակնհայտ է, որ համաժոովրդական շարժումը, որի կողքին նաև կանգնել են իրենք, վաղուց չունի իր սկզբնական ընդգրկումը։

«Դա տեղի է ունենում այն պարզպ ատճառով, որ շարժման առաջնորդը ժամանակի ընթացքում շարժումը սկսում է փոխարինել իրենով և հետզհետե ձեռք է բերում ժողովրդի անունից խոսելու բացառիկ իրավունք»,-ասաց ՀՅԴ Բյուրոյի անդամը։

Ռուստամյանի խոսքով, առաջ-առաջ գոռարով Հայաստանն անընդհատ հետ է գնում։

«Իբրև թե ժողովրդի պահանջով ու կամքով հասել ենք այնտեղ, որ ժողովրդի անունով պարբերաբար կարելի է տապալել սահմանադրական կարգը, շրջանցելօրենքներն ու կասեցնել ցանկացած պետական մարմնի լիազորություն։ Սա մի ընթացք է, որը գուժում էր ոչ ավել, ոչ պակաս սահմանադրական պետության վերջի մասին։ Այս դեպքի համար է ժողովուրդն ասում ՝մրից ելանք, մրջուրն ընկանք»,-ասաց Ռուստամյանը։
Նրա խոսքով, ամեն առիթով սեր ու համերաշխություն գոռալուց միայն ատելությունն ու թշնամանքն է ավելացել։

«Այս իշխանությունները չեն էլ նկատում, որ անընդհատ նախկինների հետ համեմատվելով կամաց-կամաց սկսում են նախկիններին նմանվել։

Հասկացե՛ք՝ ցեխաջրով լվացվելով չեն մաքրվում, այլ ցեխոտվում են, հասկացեք նաև, որ չի կարող լինել վերադարձ անցյալին, բայց սա էլ ճիշտ չի մեկնաբանվում»,-ասաց ՀՅԴԲ յուրոյի անդամը։

Ռուստամյանն ընդգծեց, որ չվերադառնալ անցյալին նշանակում է չվերադառնալ անցյալի հոռի բարքերին, այլ ոչ թե ջնջել այն ամենն, ինչ եղել է անցյալում։

«Անցյալում շատ դրական բաներ էլ են եղել, անցյալում հաղթանակներ ու մեծագույն ձեռքբերումներ են եղել, և այդ ամենը մեր ժողովուրդն է արել, պատմությունը ձեզնից չի սկսվելու»,-նշեց Արմեն Ռուստամյանը։

Աղբյուր` Փաստինֆո