Փաստ ինֆո

Փաստաբան, «Մարտի 1»-ի գործով տուժողների իրավահաջորդների  ներկայացուցիչ Վահե Գրիգորյանը, ով հավակնում էր դառնալ ՍԴ դատավոր, ակնհայտ խեղաթյուրում է գործող օրենսդրությունը, մասնագետին ոչ հարիր բառապաշարով էլ, «աննախադեպ ցինիզմ»,  «սատկած առնետի հոտ» և այլն, որակումներ տալով թերևս, նաեւ ուզում է տուժողների իրավահաջորդներին զարմացնել:

Տպավորությունն այնպիսին է, որ կամ    ՍԴ դատավորի հավակնություններ ունեցող Վահե Գրիգորյանը ծանոթ չէ  քրեական դատավարության օրենսգրքի 292 -րդ հոդվածին, կամ էլ՝ ծանոթ լինելով, գերադասում է մանիպուլյատիվ էֆեկտներով թյուրիմացության մեջ գցել տուժողների իրավահաջորդներին: 

Իսկ ՔԴՕ 292-րդհոդվածը հստակ սահմանում է, թե դատավորը վարույթ ընդունելով գործը ինչ որոշումներ կարող է կայացնել: Ըստ այդմ` քրեական գործն իր վարույթ ընդունած դատավորը հետազոտում է գործի նյութերը և քրեական գործը՝ վարույթ ընդունելու պահից և  15 օրվա ընթացքում կայացնում հետևյալ որոշումներից մեկը` «1. դատական քննություն նշանակելու մասին, 2. քրեական գործի վարույթը կարճելու կամ քրեական հետապնդումը դադարեցնելու մասին, 3. քրեական գործի վարույթը կասեցնելու մասին, 4. գործը մեղադրողին վերադարձնելու մասին, 5. գործն ըստ ընդդատության ուղարկելու մասին, 6. ինքնաբացարկի մասին»:

Ընդգծենք՝ օրենքը սահմանում է,  որ դատավորն իր որոշումը միանձնյա պիտի կայացնի, ինչն էլ արել է  դատավոր Դավիթ Գրիգորյանը՝ խափանման միջոցի հարցը քննարկելուց հետո ընտրելով ՔԴՕ 292-րդ հոդվածի հիշյալ կետերից մեկը, տվյալ պարագայում որոշում ընդունելով քրեական գործը կասեցնելու ու ՍԴ դիմելու մասին` գտնելով, որ առկա է 300.1-րդ հոդվածով առաջադրված մեղադրանքի մասով առկա է սահմանադրական անձեռնմխելիության հարցի պարզաբանման խնդիր: Այսինքն, երկու կարծիք լինել չի կարող, դատավար Դավիթ Գրիգորյանը  բացառապես գործել է  իր լիազորությունների շրջանակում:

Հարց է առաջանում՝ եթե այս՝ իրավաբանի համար դասագրքային համարվող օրենքներին չի տիրապետում Վահե Գրիգորյանը, ինչպե՞ս կարող է նա զբաղեցնել Սահմանադրական դատարանի դատավորի աթոռը:

Ինչ վերաբերվում է իր՝ խնդրո առարկա որոշմանը տեղյակ չլինելուն, ինչի մասին, ի դեպ հայտարարել էին նաեւ դատախազությունը ու պաշտպանները, ապա, դատալեքս դատական տեղեկատվական համակարգի համաձայն, որոշումը կայացվել է մայիսի 20-ին ու ուղարկվել կողմերին, ինչը տեղադրված է նաեւ Դատալեքս տեղեկատվական ցանցում: 

Չիմանալը վտանգավոր չէ, սակայն չիմանալով օրենքները մանիպուլյացիա անելն ու քաղաքական  շահարկումների առարկա դարձնելն արդեն լուրջ խնդիր եւ ոչ միայն բարոյական դաշտում:

Աղբյուր` Փաստինֆո