Փաստ ինֆո

«Դատավորները պետք է հնարավորինս ձեռնպահ մնան այն իրավիճակներից, որի արդյունքներով կարող են հայտնվել կողմի դատավարական կարգավիճակում»,- «Փաստինֆո»-ի հետ զրույցում այս կարծիքը հայտնեց Վերաքննիչ քրեական դատարանի դատավոր Արշակ Վարդանյանը՝ պատասխանելով այն հարցին, թե պատրաստվում է արդյոք բողոքարկել ոստիկանության գործողությունները կամ իրավական որեւէ ընթացակարգով բարձրացնել հարցը, որ մայիսի 20-ին մի խումբ քաղաքացիներ, նրանց թվում գործադիր եւ օրենսդիր իշխանության ներկայացուցիչներ, արգելել են դատավորներին մուտք գործել դատարան։

Դատավորն ընդգծեց. «Ամեն դեպքում, ամեն ինչ տեղի է ունեցել հրապարակայնորեն. պատկան մարմինները և պաշտոնատար անձինք նաև անմիջականորեն, իրենց լիազորությունների սահմաններում կարող են ստուգումներ իրականացնել և համապատասխան գնահատական տալ, եթե իհարկե գտնում են, որ դրա իրավական հիմքերը կան»։

Ինչ վերաբերում է պատկան մարմինների արձագանքի բավարար լինել-չլինելուն, դատավորը գնահատական չտվեց. «Որպես իրավաբան՝ դրա վերաբերյալ կարծիք ունեմ, բայց որպես դատավոր՝ չեմ կարող այս պահին գնահատական տալ և դիրքորոշում հնչեցնել»,-ասաց Արշակ Վարդանյանը։

Հիշեցնենք, որ մայիսի 19-ին ՀՀ վարչապետ Նիկոլ Փաշինյանը ֆեյսբուքյան իր էջում գրառում էր արել՝ ասելով, որ հաջորդ օրը՝ ժ. 08.30-ից արգելափակում ենք հանրապետության՝ առանց բացառության բոլոր դատարանների ելքերն ու մուտքերը, այնպես, որ ոչ ոք ներս չմտնի: Մայիսի 20-ին արդեն արգելափակվել էին դատարանների մուտքերն ու ելքերը, եւ թե դատավորները, թե փաստաբանները չէին կարողացել մուտք գործել դատարան, իսկ շենքերի մոտ գտնվող ոստիկանները որեւէ քայլ չէին ձեռնարկում դատավորների մուտքը՝  դատարաններ ապահովելու համար։

Դատարանների գործունեությանը խոչընդոտելու դեպքի առթիվ որեւէ քրեական գործ առայժմ  չի հարուցվել։

Աղբյուր` Փաստինֆո