Փաստ ինֆո

«Ամեն դեպքում, ինձ համար գերակշիռ է այն կարծիքը, որ այս որոշումը բողոքարկման ենթակա է»,- «Փաստինֆո»-ի հետ զրույցում անդրադառնալով Ռոբերտ Քոչարյանի եւ մյուսների գործի կասեցման որոշման բողոքարկման ենթակա լինել-չլինելուն՝ այս կարծիքը հայտնեց Անվտանգության խորհրդի նախկին քարտուղար Արմեն Գեւորգյանի պաշտպան, իրավաբան Էրիկ Ալեքսանյանը՝ ընդգծելով, որ ՍԴ դիմելը իրենից ներկայացնում է գործի վարույթի կասեցում. «Մինչեւ գործը չկասեցվի, դատարանը ՍԴ դիմել չի կարող»,-ասաց նա։

Էրիկ Ալեքսանյանը նշեց, որ բողոքարկման հարցը մի փոքր վիճելի է, բայց հիմնվելով ՀՀ քրեական դատավարության օրենսգքրի եւ ՀՀ սահմանադրության համապատասխան օրենքների վրա՝ կոնկրետ եզրակացության հանգել հնարավոր է. «Գործն ըստ էության չլուծող դատական ակտերի բողոքարկման վերաբերյալ կան տարբեր մեկնաբանություններ. մի դեպքում ասվում է, որ այդ որոշումը ենթակա է բողոքարկման 10-օրյա ժամկետում, մյուս դեպքում, երբ դա կայացվում է դատարանի նախաձեռնությամբ, բողոքարկման հնարավորություն չի տալիս»։

Ալեքսանյանը, սակայն, այստեղ հակասության խնդիր չի տեսնում. «Քրեական դատավարության օրենսգրքի 379-րդ հոդվածով՝ գործն ըստ էության չլուծող մյուս դատական ակտերը (մյուս ասելով՝ նկատի ունի, օրինակ, կալանքից եւ բժշկական հարկադրանքի միջոց կիրառելու որոշումներից զատ այլ դատական ակտերը, որոնց թվում է նաեւ կասեցման որոշումները), 10-օրյա ժամկետում ենթակա են բողոքարկման: Սակայն կա նաեւ Սահմանադրության համապատասխան նորմ, որը չի նախատեսում բողոքարկման ընթացակարգ։ Հակասություն կլիներ, եթե Սահմանադրությամբ ասվեր, որ այն բողոքարկման ենթակա չէ, բայց ինքն ուղիղ նման բան չի ասում, ուղղակի չի նախատեսում նման կարգ, իսկ Քրդատօրենսգրքում նախատեսում է, եւ թեեւ Սահմանադրությունն ավելի բարձր իրավական ուժ ունի, ապա մենք չենք կարող ասել, թե դրանով պետք է առաջնորդվենք, որովհետեւ այս երկուսի միջեւ իրականում հակասություն չկա, ընդամենը Սահմանադրական օրենքով կարգավորված չէ, կարգավորված է Քրդատօրենսգրքով, այսինքն՝ բողոքարկման հնարավորություն կա»։

Իրավաբանի կարծիքով՝ յուրաքանչյուր որոշումով անձի այս կամ այն իրավունքը կարող է սահմանափակվել կամ խախտվել, ուստի շահագրգիռ կողմը այն կարող է բողոքարկել. «Յուրաքանչյուր որոշում՝ կայացված քննիչի, դատախազի, ընդհուպ մինչեւ Գլխավոր դատախազի կողմից, եթե խախտում  է անձի իրավունք, ենթակա է բողոքարկման։ Եվ եթե, օրինակ, միջդատական վարույթում  Գլխավոր դատախազը որոշում է կայացնում որեւէ գործ կասեցնելու եւ ՍԴ դիմելու, ապա զուտ հետեւելով Քրեական դատավարության օրենսգրքի ընթացակարգին՝ դա եւս բողոքարկման ենթակա է»,- Փաստինֆո»-ի հետ զրույցում նշեց Էրիկ Ալեքսանյանը՝ հավելելով, որ ամեն դեպքում, դատարանի այս որոշումն իրենց համար հիմնավոր է. «Ուսումնասիրելով այս որոշումը, դրանում առկա հիմնավորումները, օրենսդրական վերլուծությունները եւ հանգած հետեւությունները՝ գտնում ենք, որ եթե անգամ Դատախազությունը բողոքարկի, այն լինելու է ապարդյուն, որովհետեւ Առաջին ատյանի դատարանի հիմնավորումները բացառապես բխում են օրենքից»։

Հեղինակ` Միլենա Խաչիկյան