Փաստ ինֆո

Ավան և Նոր Նորք վարչական շրջանների  ընդհանուր իրավասության դատարանում` դատավոր Հարություն Մանուկյանի նախագահությամբ, այսօր՝ մայիսի 21-ին, մեկնարկեց ոստիկանության զորքերի նախկին հրամանատար, ոստիկանության գեներալ-լեյտենանտ Լևոն Երանոսյանի գործով դատավարությունը։

Տուժողների մի մասը դատական նիստին ներկա չէին՝ դատարանի կողմից ուղարկված ծանուցումները չստանալու պատճառով։ Տուժող կողմի ներկայացուցիչ Տիգրան Եգորյանը ուշ ներկայացավ դատարան` պատճառաբանելով ծանրաբեռնվածությամբ:

Դատարանը կողմերին ծանոթացրեց կողմերի` տուժողների ու մեղադրյալի իրավունքներն ու պարտականություները։ Դատարանը կողմերին միջնորդություններ ներկայացնելու հնարավորություն տվեց։

Լ.Երանոսյանի պաշտպան Տիգրան Սաֆարյանը միջնորդեց դատարանում հարցաքննել  ՀՀ վարչապետ Նիկոլ Փաշինյանին եւ ոստիկանապետ Վալերի Օսիպյանին, Սյունիքի մարզպետ Հունան Պողոսյանին:

«Ոստիկանության երկու բարձրաստիճան պաշտոնյաները դեպքի ժամանակ գտնվել են դեպքի վայրում եւ ականատես են եղել գործողություններին, որոնց կապակցությամբ մեղադրանք է առաջադրվել Լեւոն Երանոսյանին։ Նիկոլ Փաշինյանը եւս ներկա է գտնվել այնտեղ եւ տիրապետում է տեղեկության, որը սույն գործի դատաքննության ժամանակ անհրաժեշտ է պարզաբանել», - հայտարարեց փաստաբանը։

Մեղադրող դատախազ Ա. Շահբազյանն առարկեց` նշելով, որ պարզ չէ, թե ինչ կարեւոր հանգամանք պետք է հայտնեն նշված անձինք:

Դատարանը միջնորդության քննարկումը հետաձգեց։

«Փաստինֆո»-ն ավելի վաղ տեղեկացրել է, որ Լևոն Երանոսյանը մեղադրվում է պաշտոնեական լիազորություններն անցնելու մեջ: Ըստ մեղադրանքի` 2018 թվականի ապրիլի16-ին և 22-ին ՝Երևան քաղաքում անցկացված բողոքի զանգվածային ակցիաների ժամանակ, ցուցարարների նկատմամբ գործադրել է ընդհանուր առմամբ 8 հատ  «Զարյա» տեսակի լուսաձայնային նռնակներ, ինչի հետևանքով 2 տասնյակից ավելի անձանց առողջությանը պատճառվել է տարբեր աստիճանի, այդ թվում` ծանր և միջին ծանրության վնաս:

Լևոն Երանոսյանի կողմից հատուկ միջոցների գործադրման հետևանքով Բաղրամյան պողոտայում ծառայություն իրականացնող ՀՀ ոստիկանության զորքերի զինծառայողներից 6 հոգի նույնպես ստացել են մարմնական վնասվածքներ:
 
Այսօր`մայիսի 21-ին, նա հանդես է եկել հայտարարությամբ` նշելով, ոչ չի ընդունում առաջադրված մեղադրանքը:

«Ես՝ գեներալ-լեյտենանտ Լևոն Երանոսյանս, հանրությանը տեղեկացնում եմ, որ առաջադրված մեղադրանքը չեմ ընդունում անհիմն լինելու պատճառով: Ինչպես իմ ծառայության ողջ ընթացքում, այնպես էլ 2018 թվականի ապրիլի 16-ին և  22-ին Երևան քաղաքում տեղի ունեցած իրադարձությունների ընթացքում գործել եմ բացառապես ծառայելով Հայաատանի ազգային և պետական շահերին:

Նշված իրադարձությունների ժամանակ ՀՀ ոստիկանության գործողությունները ընդհանրապես և իմ գործողությունները, մասնավորապես եղել են իրավաչափ և ստեղծված իրադրությանը լիովին համաչափ:

Այդ գործողություններով կանխվել են զանգվածային բախումները ցուցարարների եւ ոստիկանության ուժերի միջև, իսկ նման գործողությունների չդիմելու դեպքում նույնիսկ դժվար է պատկերացնել, թե ինչ հետևանքների առաջ կարող էր կանգնած լինել մեր պետությունը:

Ոստիկանության գործողությունների արդյունքում և դրանց շնորհիվ է հնարավոր եղել ապահովել իշխանության խաղաղ և անցնցում փոխանցումը. մի փաստ, որը հնարավոր չէ հերքել անաչառ լինելու դեպքում», - նշել է Երանոսյանը` գրավոր հայտարարության մեջ:
 
Հաջորդ դատական նիստը տեղի կունենա հունիսի 11-ին։

Հեղինակ` Մերի Մնոյան