Փաստ ինֆո

«Կոչ եմ անում ժամը 13.30-ից վերացնել բոլոր դատարանների արգելափակումը»,-այս մասին ֆեյսբուքյան լայվով քիչ առաջ հայտարարեց ՀՀ վարչապետ Նիկոլ Փաշինյանը. «Մեր ակցիան ծառայեց իր նպատակին, բոլորին ակնհայտ դարձավ, որ չի կարող լինել դատական համակարգ, որի իշխանությունը չի բխում ժողովրդի կամքից»։

Խոսելով ակցիայի նպատակների մասին՝ վարչապետն ընդգծեց, որ դրանց իրագործման համար արդեն իսկ աշխատանքի բաժանում են արել. «Այդ ակցիայի նպատակը արձանագրելն էր, որ ՀՀ-ում իրապես անկախ դատական համակարգ ունենալը ժողովրդական պահանջ է, որ այդ պահանջի մեջ ժողովուրդն ու կառավարությունը միասնական են, եւ որ հիմա սկսվում է անկախ դատական համակարգ ունենալու գործընթացը։ Մենք աշխատանքի բաժանում արեցինք Ազգային ժողովի, Կառավարության եւ այլ մարմինների միջեւ»։

Վարչապետը շնորհակալություն հայտնեց ակցիային մասնակցած քաղաքացիներից. «Նախ ուզում եմ շնորհակալություն հայտնել բոլոր այն քաղաքացիներին, ովքեր, արձագանքելով իմ կոչին, այսօր առավոտյան արգելափակեցին ՀՀ բոլոր դատարանների մուտքերն ու ելքերը։ Սա նաեւ միջոց էր ի ցույց դնելու այն հանրային վրդովմունքը, որ գոյություն ունի անարդար դատական համակարգի կապակցությամբ, եւ մենք տեսնում էինք, որ դատական համակարգում տարերային պրոցեսներ են տեղի ունենում, եւ շատ կարեւոր է դրանց բովանդակային վերափոխումը ի նպաստ ՀՀ անկախ դատական համակարգ ունենալու»։

Վարչապետը ներողություն խնդրեց նաեւ այն քաղաքացիներից, որոնց իրավունքի իրացումը մի քանի ժամով խոչընդոտվել է. «Գիտեմ, որ դատական գործեր են հետաձգվել, եւ ուզում եմ ներողություն խնդրել այդ անձանցից, սակայն հույս ունեմ, որ նրանք հասկանում են, որ այս ամենը ոչ թե նրանց իրավունքների խոչընդոտելու համար էր, այլ պաշտպանության ինստիտուցիոնալ երաշխիքներ ստեղծելու»,-ասաց նա եւ ամփոփեց. «Ես երաշխավորում եմ, որ քաղաքացու հաղթանակը անշրջելի է ՀՀ-ում, բայց երաշխավորում եմ ոչ թե ինքս ինձով, այլ ձեր կամքը տեսնելով»։

Աղբյուր` Փաստինֆո