Փաստ ինֆո

ՀՀ գլխավոր դատախազությունն այսօր օրվա երկրորդ կեսին հայտարարությամբ հանդես եկավ՝ նշելով,  թե հանձնարարվել է  ակցիայի ընթացքում արձանագրված ահազանգերն եւ հաղորդումներն ուղարկել դատախազություն։

«Գլխավոր դատախազի կողմից հանձնարարվել է դատարանների մուտքերն ու ելքերն արգելափակելուն ուղղված գործողությունների ժամանակ կատարված առերևույթ հանցագործության վերաբերյալ ներկայացված բոլոր հաղորդումներն ու ահազանգերն ուղարկել ՀՀ գլխավոր դատախազություն՝ դրանք ՀՀ հատուկ քննչական ծառայություն ուղարկելու»,- նշված էր դատախազության հայտարարության մեջ։

«Փաստինֆո»-ն Գլխավոր դատախազի խորհրդական Գոռ Աբրահամյանից փորձեց ճշտել՝ միայն ներկայացված հաղորդումների՞ն է ընթացք տրվել թե՞ նաեւ ինքնին դատարանների աշխատանքի արգելափակման փաստին։ Մեր հարցին ի պատասխան Գոռ Աբրահամյանն ասաց. «Հաղորդումներին՝ համակողմանի ստուգման առարկա դարձնելու և իրավական գնահատականի արժանացնելու համար»: Մեր ճշգրտող հարցին՝ արդյո՞ք որեւէ ընթացք տրվել է կամ տրվելու է դատարանների ելքն ու մուտքն արգելափակելու մասին գործադիր իշխանության ղեկավարի՝ ՀՀ վարչապետի մայիսի 19-ի երեկոյան հնչեցրած կոչին, Գոռ Աբրահամյանը պատասխանեց. «Համակողմանի կստուգվեն, այս պահին ավելին ասել չեմ կարող»:

Հիշեցնենք, որ երեկ երեկոյան ՀՀ վարչապետ Նիկոլ Փաշինյանը ֆեյսբուքյան իր էջում գրել էր, որ առավոտյան՝ ժամը 08.30-ից, արգելափակում ենք հանրապետության՝ առանց բացառության բոլոր դատարանների ելքերն ու մուտքերը, այնպես, որ ոչ ոք ներս չմտնի: Վաղ առավոտյան արդեն արգելափակված էին թե Երեւանի, թե մարզերի դատարանների մուտքերը։ Այսօր վաղ առավոտից դատարանները փակ են եղել, նախապես նշանակված նիստերը՝ հետաձգվել, որեւէ դատավոր չի կարողացել մուտք գործի դատարան, արձանագրվել են նաեւ առանձին ոտնձգության դեպքեր։

Ավելի ուշ՝ ժ. 12։00-ին, Նիկոլ Փաշինյանը հայտարարեց, որ Հայաստանում գործող բոլոր դատավորները պետք է ենթարկվեն, այսպես ասած, vetting-ի. «Այսինքն՝ հանրությունը պետք է ամբողջական տեղեկատվություն ունենա դատավորի ունեցած քաղաքական կապերի ու ծագումնաբանության, գույքային վիճակի, դատավորի կարգավիճակում եւ նախորդ շրջանում ծավալած գործունեության, անհատական եւ պրոֆեսիոնալ հատկանիշների մասին»,-ասաց նա։

Հեղինակ` Միլենա Խաչիկյան