Փաստ ինֆո

«Այն, ինչ տեղի ունեցավ վարչապետի եւ այլ պաշտոնատար անձանց կողմից, ես կարծում եմ, որ չի կարող գնահատվել այլ կերպ, քան դատարանների նկատմամբ բացահայտ ճնշում»,- «Փաստինֆո»-ի հետ զրույցում այս կարծիքը հայտնեց Վերաքննիչ քրեական դատարանի դատավոր Ալեքսանդր Ազարյանը. «Առավոտյան ես փորձեցի գնալ աշխատանքի, բայց տեսա, որ դատարանի մուտքի մոտ ամբոխ է հավաքված, եւ չմոտեցա նույնիսկ՝ վստահ լինելով, որ կարող է պրովոկացիա լինել»։

Մեր այն հարցին, թե ինչպես է գնահատում վարչապետի այսօրվա ելույթը, դատավորը պատասխանեց, որ մեծամասամբ չի հետեւել. «Այնուամենայնիվ, լուրջ չեմ մոտենում այն ամենին, ինչ ասել է կամ ասելու է նա, ինձ համար միեւնույն է՝ ինչ է առաջարկել»։

Դատավորի խոսքով՝ ինքը խորը հիասթափություն է ապրել. «Գիտե՞ք՝ ժամանակին ապրիլյան իրադարձությունները ես էլ էի հեղափոխություն անվանում, եւ երկու ձեռքով կողմ էի այն ամենին, ինչ տեղի ունեցավ, բայց հետագայում խորը հիասթափություն ապրեցի՝ նախեւառաջ վարչապետի եւ նրան մոտ անձանց՝ արդարադատություն իրականացնող մարմինների նկատմամբ ունեցած վերաբերմունքից»։

Ազարյանը պնդեց՝ ինքը չի պատրաստվում հրաժարական տալ. «Ես աշխատելու եմ այնքան, որքան որ համապատասխան մարմինները կգտնեն, որ պետք է աշխատեմ, եւ արդարադատություն կիրականացնեմ այնքան, որքան որ դրա պահանջը կզգացվի, եւ հասարակությունը չէ, որ պիտի որոշի՝ ես աշխատելու եմ թե ոչ, ես պիտանի եմ թե ոչ։ Եթե հրապարակում կամ դատարանների դռները փակող մարդիկ պետք է որոշեն, ես այլ կերպ չեմ կարող որակել, քան փողոցային արդարադատություն։ Դա՞ է առաջարկում Փաշինյանը, հասարակությունը իրավաբանորեն «ա»-ն ու «բ»-ն չի տարբերում, ինքն էլ չի տարբերում, իրեն շրջապատող իրավաբաններն էլ, ինչի՞ մասին է խոսքը»,-ասաց նա եւ հավելեց. «Ես չեմ պատրաստվում հրաժարական տալ, քանի դեռ չի լրացել իմ թոշակի տարիքը, կամ էլ թող հիմք գտնեն՝ ինձ աշխատանքից ազատելու»։

Հեղինակ` Միլենա Խաչիկյան