Փաստ ինֆո

Փաստաբան Հրանտ Անանյանը հանցագործության մասին հաղորդում է ներկայացրել ՀՀ գլխավոր դատախազ Արթուր Դավթյանին դատավոր Դավիթ Բալայանի հետ կատարված միջադեպի վերաբերյալ։ Այս մասին «Փաստինֆո»-ն տեղեկացավ փաստաբանի ֆեյսբուքյան գրառումից։ Հաղորդման մեջ մասնավորապես ասվում է. «Համացանցում տեսանյութ է տարածվել թե ինչպես են այսօր առավոտյան մի խումբ քաղաքացիներ Երեւանի ընդհանուր իրավասության դատարանի Շենգավիթի նստավայրի մոտ նույն դատարանի դատավոր դատական իշխանության ներկայացուցիչ Դավիթ Բալայանին խոչընդոտում մուտք գործել դատարանի շենք եւ կատարել իրենց ծառայողական պարտականությունները, ինչի կապակցությամբ ակնհայտ եւ հստակ բռնություն են գործադրում նրա նկատմամբ, որի արդյունքում նա ընկնում է գետնին, իսկ այդ ընթացքում հավաքվածներից մեկը վիրավորական արտահայտություններ է հնչեցնում նրա հասցեին»։

Փաստաբանը մեջբերել է ՀՀ քրեական օրենսգրքի 316-րդ հոդվածը, որը սահմանում է իշխանության ներկայացուցիչի նկատմամբ բռնություն գործադրելը.
 
1. Իշխանության ներկայացուցչի կամ նրա մերձավոր ազգականի նկատմամբ կյանքի կամ առողջության համար ոչ վտանգավոր բռնություն գործադրելը կամ բռնություն գործադրելու սպառնալիքը՝ կապված նրա կողմից իր ծառայողական պարտականությունները կատարելու հետ՝

պատժվում է տուգանքով՝ նվազագույն աշխատավարձի երեքհարյուրապատիկից հինգհարյուրապատիկի չափով կամ կալանքով՝ առավելագույնը մեկ ամիս ժամկետով, կամ ազատազրկմամբ՝ առավելագույնը հինգ տարի ժամկետով:

 Փաստաբանը մեջբերել է նաեւ ՀՀ ՔՕ-ի 343-րդ հոդվածը, որը սահմանում է դատարանի նկատմամբ անհարգալից վերաբերմունքը.

 2. Դատարանի նկատմամբ անհարգալից վերաբերմունքը, որը դրսևորվել է պաշտոնեական լիազորությունների իրականացման առնչությամբ դատավորին վիրավորելով՝

պատժվում է տուգանքով՝ նվազագույն աշխատավարձի երկուհարյուրապատիկից հինգհարյուրապատիկի չափով, կամ կալանքով՝ երկուսից երեք ամիս ժամկետով:

«Նկատի ունենալով, որ նշված տեսանյութերը պարունակում են ակնհայտ հանցագործության մասին հատկանիշներ ՀՀ ՔՕ-ի առնվազն վերոնշյալ հոդվածներով, ուստի խնդրում եմ հարուցել քրեական գործ, ձեռնարկել քննություն եւ մեղավորներին ենթարկել քրեական պատասխանատվության»,-գրել է փաստաբան Հրանտ Անանյանը։

Աղբյուր` Փաստինֆո