Փաստ ինֆո

Իրավաբանական գիտությունների թեկնածու Դավիթ Թումասյանն անդրադարձել է դատավոր Դավիթ Բալայանի հետ այսօր տեղի ունեցած միջադեպին

«ՀՀ քրեական օրենսգրքի 316-րդ հոդվածի համաձայն` իշխանության ներկայացուցչի կամ նրա մերձավոր ազգականի նկատմամբ կյանքի կամ առողջության համար ոչ վտանգավոր բռնություն գործադրելը կամ բռնություն գործադրելու սպառնալիքը՝ կապված նրա կողմից իր ծառայողական պարտականությունները կատարելու հետ՝ պատժվում է (...)։

ԱՐԴ/0038/01/13 քրեական գործի նախադեպային որոշումից` 15. Իշխանության ներկայացուցչի կողմից իր ծառայողական պարտականությունները կատարելը ենթադրում է, որ իշխանության ներկայացուցիչը գործում է օրենքով և այլ իրավական ակտերով նրան վերապահված լիազորությունների շրջանակում։ Այլ խոսքով՝ ՀՀ քրեական օրենսգրքի 316-րդ հոդվածով նախատեսված հանցակազմի առկայության համար անհրաժեշտ է, որպեսզի իշխանության ներկայացուցչի գործողությունները լինեն իրավաչափ, հակառակ դեպքում արարքը չի կարող գնահատվել որպես կառավարման կարգի դեմ ուղղված հանցագործություն

….. Սուբյեկտիվ կողմից հիշյալ հանցագործությունը կատարվում է ուղղակի դիտավորությամբ՝ արարք կատարած անձը գիտակցում է, որ իշխանության ներկայացուցչի կամ նրա մերձավորի նկատմամբ բռնություն է գործադրում կամ բռնության սպառնալիք է տալիս։ Ընդ որում, սուբյեկտիվ կողմի պարտադիր հատկանիշ է հանցանք կատարած անձի նպատակը՝ խոչընդոտել իշխանության ներկայացուցչի ծառայողական գործունեությանը կամ դադարեցնել այն, կամ էլ շարժառիթը՝ վրեժ լուծել իշխանության ներկայացուցչից նրա գործունեության համար։

Դատավորի՝ իր աշխատանքի վայրը մտնելը և իր մասնագիտական գործունեությունն իրականացնելը միանշանակ օրենքով և այլ իրավական ակտերով նրան վերապահված լիազորությունների շրջանակում է և ուղղված է նրա ծառայողական պարտականությունները կատարելուն: Դատավորն իր լիազորություններն իրականացնելու համար այլ աշխատատեղ չունի և հեռահար եղանակով չի կարող իրականացնել արդարադատություն, այսինքն՝ դատարանի շենք մուտք գործելն իր գործունեության պարտադիր նախապայմաններից է: Ավելին, հրող անձինք անհնարին է չիմանան, որ Դ. Բալայանը դատավոր է, և նրան թույլ չեն տալիս մտնել դատարանի շենք հենց դատավոր լինելու պատճառով:

ՀՀ քրեական օրենսգրքի 316-րդ հոդվածի 3-րդ մասում տրված է պարզաբանող նորմ, որի համաձայն՝ սույն օրենսգրքում իշխանության ներկայացուցիչ է համարվում պետական և տեղական ինքնակառավարման մարմիններում ծառայող այն անձը, ով ծառայողական ենթակայության տակ չգտնվող անձանց նկատմամբ սահմանված կարգով օժտված է կարգադրիչ լիազորություններով:

Այն, որ դատավորն օժտված է կարգադրիչ լիազորություններով ԱՆՀԵՐՔԵԼԻ Է, և այս իմաստով հոդվածի մասում նշվում է այն անձանց շրջանակը, ովքեր կարող են լինել տուժող, այլ ոչ թե այդ պահին կարգադրիչ լիազորություններ իրականացելու պարտադիր պայմանը: 

Հարկ է հիշել, որ ՀՀ քրեական օրենսգրքի 316-րդ հոդվածով նախատեսված հանցագործությունը կառավարման կարգի դեմ է, այլ ոչ թե արդարադատության: Հետևաբար, այս հանցագործության անմիջական օբյեկտն է հանդիսանում կառավարման նորմալ գործունեության, ինչպես նաև իշխանության ներկայացուցիչների կողմից կառավարման հետ կապված իրենց լիազորությունների նորմալ իրականացման ապահովմանն ուղղված հասարակական հարաբերությունները:

Եթե նման վարքագիծը պայմանավորված լիներ կոնկրետ քրեական գործով դատավորի մասնագիտական գործունեությամբ, այդ դեպքում կքննարկվեր արարքի արդարադատության դեմ ուղղված լինելը»:

Աղբյուր` Փաստինֆո