Փաստ ինֆո

«Վաղը Ոստիկանությունը պարտավոր է եւ իմ հրամանն է, որ ապահովի խաղաղ ակցայի անվտանգությունը, բայց ես կարծում եմ, որ մեր ակցիայի մասնակիցները եւս պետք է այս հրամայակաանը իրենց աչքի առաջ ունենան»,-այս մասին քիչ առաջ ֆեյսբուքյան լայվով հայտարարեց ՀՀ վարչապետ Նիկոլ Փաշինյանը. «Ես գիտեմ, տեսնում եմ, որ կան մարդիկ, ովքեր դեռ մտածում են, որ կարող են բռնությամբ հարցեր լուծել, եւ կան դատարաններ, որ այդ մարդկանց աջակցություն են ցուցաբերոմ, բայց ես ուզում եմ հիշեցնել, որ մենք արդեն ապացուցել ենք, որ ատելությունը եւ բռնությունը բացառող հանգամանքը մեր հաղթանակի գրավականն է»:

Անդրադառնալով վաղը կայանալիք ակցիաներին` վարչապետը նշեց, որ թավշյա հեղափոխության ոչ բռնի տրամաբանությունը պետք է պահպանել եւ վաղը. «Մեր ակցիաների ընթացքում պետք է լինենք կատարյալ քաղաքավարի միմյանց եւ ուրիշների, նույնիսկ նրանց նկատմամբ, ովքեր դժգոհ են մեր ակցիաներից, մենք չենք զլանա նույնիսկ նրանցից ներողություն խնդրել եւ  որեւէ սադրանքի չենք գնա, կլինենք միասնական, բաց ոչ մի բան մեզ հետ չի պահի մեր նպատակներին հասնելուց` ՀՀ-ն իրոք անկախ, իրոք ժողովրդավար եւ իրավական պետություն դարձնելուց»:

Նիկոլ Փաշինյանն ասաց, որ ինքն անձամբ այդ ճանապարհով մինչեւ վերջ կգնա եւ ոչ մի բանի առաջ չի կանգնի. «Քանի դեռ ժողովուրդը լիազորում է ինձ, ես այդ ծառայությունները կմատուցեմ ամբողջ ծավալով, ուղղակի խնդրանքս այն է, որ մեր հաղթական պայքարը որեւէ սադրանքով, բռնությամբ եւ հայհոյանքով չմթագնենք»:

Նիկոլ Փաշինյանը հիշեցրեց` վաղը` ժ. 08:30-ից արգելափակվում են ՀՀ բոլոր դատարաններ ելքերն ու մուտքերը այնպես, որ ոչ ոք ներս չմտնի. «Իսկ 12:00-ին ձեզ հետաքրքրող բոլոր հարցերի պատասխանները կփորձեմ տալ եւ կհայտարարեմ մեր հետագա անելիքները»,-ասաց նա:

Աղբյուր` Փաստինֆո