Փաստ ինֆո

Այսօր ‹‹Արմենիա Մարիոթ›› հյուրանոցում տեղի ունեցավ ‹‹Մեկ Հայաստան›› կուսակցության հիմնադիր համագումարը, որին մասնակցում էին նաև ‹‹Բարգավաճ Հայաստան›› խմբակցության պատգամավորներ Գևորգ Պետրոսյանը, Արման Աբովյանն ու ‹‹Հայաստանի Հանրապետական›› կուսակցության փոխնախագահ Արմեն Աշոտյանը:

Նախաձեռնողների ներկայացմամբ՝ կուսակցության նպատակն է խթանելՀայաստանում ժողովրդական քաղաքական համակարգի կայացումը և նպաստել քաղաքացիական նոր մշակույթի ու պետական մտածողության արմատավորումը:
Ներկայացուցիչների խոսքով, ամիսներ առաջ արձանագրելով Հայաստանում նոր, ցենտրիստական քաղաքական ուժի ստեղծման անհրաժեշտությունը, իրենք հայտարարել են կուսակցության ստեղծման ընթացքի մասին:

‹‹Կուսակցության ֆինանասները գոյանում են որոշակի հանգանակություններից, որոնք տրվում են մեր գաղափարակից ընկերների կողմից, ովքեր պատրաստ են աշխատել և օգնել ՀՀ-ին ուժեղ պետություն դառնալու համար››,-համաժողովի ժամանակ, լրագրողների հետ զրույցում ասաց ‹‹Մեկ Հայաստան›› կուսակցության նախաձեռնող խմբի անդամ Արթուր Ղազինյանը:

Նա նշեց, որ հրապարակայնության սկզբունքը ապահովելու համար գրանցվելուն պես կհրապարակեն իրենց ֆինանսական միջոցների աղբյուրները:

Ա.Ղազինյանի փոխանցմամբ՝ կուսակցությունը կազմված է իրենց ոլորտում հեղինակություն և ազդեցություն ունեցող մարդկանցից, որոնք մինչ այժմ զբաղվել են փորձագիտական գործունեությամբ:

Հարցին՝ կուսակցությանը չե՞ն մեղադրի քաղաքական անփորձության մեջ, Ղազինյանը պատասխանեց՝ հպարտ է, որ չունի քաղաքական փորձ Հայաստանում, որովհետև բոլորն էլ գիտեն, թե այդ քաղաքական փորձն ինչպիսին է և ինչ ընկալում ունի ՀՀ քաղաքացիների մոտ:

‹‹Ես չունեմ այդ փորձը, բայց ունեմ փորձագիտական, հրապարակային գործունեության փորձ, ունեմ հստակ սկզբունքներ և արժեքներ ու իմ ամբողջ կյանքում առաջնորդվել եմ բացառապես կառուցողական տրամաբանությամբ, հավատարիմ մնացել այդ սկզբունքներին››,-ասաց նախաձեռնող խմբի անդամը:
Նա ընդգծեց, որ իրենք գրանցման պահից պատրաստվելու են մասնակցել համապետական և տեղական ինքնակառավարման մարմինների ընտրություններին:

‹‹Փաստինֆո››-ի թղթակցի հարցին, թե մինչև ընտրությունները, որպես արտախորհրդարանական ուժ ինչ գործունեություն են պատրատվում ծավալել, Ղազինյանը պատասխանեց.

‹‹Սկսելու ենք մշակել կոնկրետ ոլորտների հայեցակարգեր, ռազմավարություններ, ցույց տալու համար քաղաքացիներին, թե ինչպես են պրակտիկ լուծվելու իրենց առջև ծառացած ամենօրյա խնդիրները: Ի տարբերություն մնացածի, որոնք սկսել են մեղադրել հնին և նորին, մենք վարելու ենք ապագայի քաղաքականություն››,-ասաց ‹‹Մեկ Հայաստան›› կուսակցության նախաձեռնող խմբի անդամը:
‹‹Փաստինֆո››-ի թղթակցի մեկ այլ հարցին, թե Ռոբերտ Քոչարյանի՝ նոր ընդդիմության ստեղծման հայտարարությունը ի՞նչ վտանգներ կարող է առաջացնել իշխանության համար, և հնարավո՞ր է իրենց կուսակցությունը նույնպես դառնա այդ ընդդիմության մասը, Ղազինյանը պատասխանեց, որ իրենք ունեն իրենց ուղղությունն ու մաս դառնալ չեն ցանկանում։ Այդուհանդերձ հայտարերց, որ իրենք գործելու են ընդդիմադիր դաշտում՝ լինելով կառուցողական ընդդիմադիր կուսակցություն և պատրաստվում են առաջնորդվել ՀՀ ապագայի քաղաքականությունը մշակելու ու ձևավորելու ուղղությամբ:

‹‹Մեր գիծը հստակ է, մենք հայտարարել ենք մեր սկզբունքները, իդեալներն ու արժեքները, որոնցով առաջնորդվելու ենք: Միլիմետր անգամ չենք պատրաստվում շեղվել մեր հռչակած արժեքներից, եթե կլինեն գաղափարակից մարդիկ, ուժեր, որոնք կցանականան միանալ այս հոսանիքին, ապա մենք կքննարկենց ցանկացած նման առաջարկություն››,-ասաց ‹‹Մեկ Հայաստան›› կուսակցության ղեկավար Արթուր Ղազինյանը:

Հեղինակ` Սոնա Գեւորգյան