Փաստ ինֆո

Քոչարյանը դատավարությանը մասնակցելու է և ինչպես նախկինում պատկերավոր արտահայտվել է, մեղադրողը լինելու է ինքը: Այսօր լրագրողների հետ զրույցում ասաց ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանը:

Նա նշեց, որ Քոչարյանը մեղադրելու է այն իրավապահներին և մասնավորապես դատախազությանը, ովքեր մեղադրանքը սարքել և ուղարկել են դատարան:

‹‹Նրանք 10 զոհերի քննությունը թողած ընկել են կոնկրետ նպատակ իրականացնելու հետևից››,-ասաց Ալումյանը:

Լրագրողի հարցին՝ արդյոք Քոչարյանը կարող է կամ ցանկանում է երկրից դուրս գալ՝ Ալումյանը պատասխանեց, որ ըստ ՀՀ օրենսդրության նա պետք է գտնվի Հայաստանի տարածքում և այլ ցանկություն չունի, քան մասնակցել դատավարությանը:

‹‹Երկրորդ նախագահը անելու է իրենից կախվածը, որպեսզի հանրությունը և պետական իշխանական մարմինները, որոնք հետաքրքրված են գործի իրական խնդիրների բացահայտմամբ, իրականությունը լավ պատկերացնեն››,-ասաց Քոչարյանի պաշտպանը:

Ալումյանն ընդգծեց, որ խափանման միջոցի որոշումը դատախազության կողմից բողոքարկման ենթակա չէ:

‹‹Օրենքով մյուս կողմը բողոքարկելու իրավունք չունի, բայց եթե կրկին գնանք ապօրինության ճանապարհով, եթե նորից սկսեն այն ապօրինությւոնները, որոնք մենք տեսել ենք, կրկին ‹‹Այդ ո՞վ է այդ դատավորը, որ իմ ասածը չկատարի››, ‹‹Ես այդ մկներին ու նրանց ճտերին այս կանեմ, այն կանեմ››, եթե կրկին ամեն ինչ եղավ այս ճանապարհով, ես չեմ բացառում, որ դատախազությունն էլ բողոք բերի, վերաքննիչ դատարանն էլ բողոքը վարույթ ընդունի կամ որոշումը բեկանվի››,-ասաց պաշտպանը:

Նա նշեց, որ ցանկացած ազատության մեջ գտնվող մեղադրյալ ունի պարտականություններ չթաքնվել քննությունից և չխոչընդոտել քննությանը, և եթե որևէ մեղադրյալ խախտի դրանք, ապա կկալավորվի:

Լրագրողի հարցին՝ արդեն երկրորդ անգամ Քոչարյանը ազատ է արձակվում, սա չի՞ խոսում այն մասին, որ Հայաստանի իշխանությւոնների համար սկզբունքային չէ նրան կալանքի տակ պահելը, Ալումյանը պատասխանեց.

‹‹Ոչ, նայեք՝ ինչ ճնշումներ սկսվեցին դատավոր Ազարյանի նկատմամբ, երբ նա ազատ արձակեց Քոչարյանին, և այսօրվանից սկսած բոլորս միասին փորձենք հետևել ուշադրությամբ, թե ինչ ճնշումների կարող է ենթարկվել Դավիթ Գրիգորյանը››:

Պաշտպանի խոսքով, մարդկանց մոտ տպավորություն է ստեղծել, որ եթե Քոչարյանին դատավորը ազատ արձակեց ուրեմն վախեցել է նրանից կամ փող է ստացել:

Ալումյանը նշեց, որ այս հանգամանքը մարդկանց թշնամացնում է այդ դատավորի դեմ:

‹‹Սա այն նույն ձեռագիրն է, ինչ 2008թ.-ին մարտի 1-ին ժողովրդին ուզում էին համոզել, որ ոստիկանությունը ազատության հրապարակում առավոտյան 5 տարեկան երեխա է սպանել: Հասկանու՞մ եք, սա նույն ձեռագիրն է››,-ասաց ՀՀ երկրորդ նախագահի պաշտպան Հայկ Ալումյանը:

Հիշեցնենք, որ Երեւանի ընդհանուր իրավասության դատարանում՝ դատավոր Դավիթ Գրիգորյանի նախագահությամբ, այսօր որոշեց ազատել ՀՀ երկրորդ նախագահ Ռոբերտ Քոչարյանին։  Արցախի նախագահ Բակո Սահակյանը եւ Արցախի նախկին նախագահ Արկադի Ղուկասյանը  դատարանում երաշխավորեցին ՀՀ երկրորդ նախագահ Ռոբերտ Քոչարյանի ազատության համար։ Ռոբերտ Քոչարյանը չէր մասնակցում դատական նիստին։

Դատարանը հարգեց նրանց երաշխավորությունը։

Հեղինակ` Սոնա Գեւորգյան