Փաստ ինֆո

Մինչ հանրությունը շունչը պահած սպասում է, թե այս անգամ ինչ որոշում  կկայացնի  դատարանը՝  ՀՀ 2-րդ նախագահ Ռոբերտ Քոչարյանի խափանման միջոցի հարցի առնչությամբ, ի վերջո, հնարավորություն կտրվի՞ նրան ազատության մեջ գտնվելով պաշտպանել իր իրավունքներն ու իր կայացրած որոշումները՝ արդեն դատաքննության փուլ մտած գործի շրջանակում, օդում շարունակում է կախված մնալ մի մեծ հարցական՝ ինչու՞ է ահ ու սարսափ ներշնչում Արցախի առաջին, Հայաստանի երկրորդ նախագահ Ռոբերտ Քոչարյանի կերպարը, որն արդեն տևական ժամանակ փակի տակ է պահվում:

Ընդ որում, այս անգամ դատարանը պիտի որոշում կայացնի՝ հաշվի առնելով շատ կարևոր ու նուրբ հանգամանք, այն է՝ Արցախի ներկա և նախկին նախագահների գրավոր երաշխավորությունն ու դատարանի առջև արված պնդումներն առ այն, որ Արցախի առաջին և  ՀՀ երկրորդ նախագահը որևէ կերպ չի խոչընդոտի դատապրոցեսին:

Հիշեցնենք, որ դեռևս մարտ ամսին  Երեւանի ընդհանուր իրավասության առաջին ատյանի դատարանն ու վերաքննիչ քրեական դատարաններն արձանագրել էին, որ Ռոբերտ Քոչարյանին ակաշառքի դրվագով առաջադրված մեղադրանքում հիմնավոր կասկածը բացակայում է, իսկ որպես խափանման միջոց ընտրված կալանավորումը երկարացնելու համար մատնանշվել էր  գործի վրա ազդելու հավանականությունը: Երեւանի ընդհանուր  դատարանը բացառել է ՀՀ երկրորդ նախագահ Ռոբերտ Քոչարյանի թաքնվելու հանգամանքը, եւ կալանավորման համար հիմք է ընդունել գործի վրա ազդելու հավանականությունը: Այդ մասին դատական նիստի ավարտից հետո հայտարարել էր  Քոչարյանի պաշտպանական խմբի անդամ, փաստաբան Արամ Օրբելյանը։

Հարց է ծագում, այս անգա՞մ ի՞նչը կարող է առիթ հանդիսանալ Ռոբերտ  Քոչարյանի նկատմամբ խափանման միջոց կալանքը չփոխելու համար, մանավանդ, արդեն գործը դատաքննության փուլում է և ձևակերպումը, թե՝ երկրորդ նախագահը ազատության մեջ լինելով կարող է խոչընդոտել նախաքննության ընթացքին, ուղղակի ժամանակավրեպ է: 

Իսկ եթե այս խնդիրը դիտարկենք մեկ այլ հանրային հնչեղություն ունեցող՝ Սասնա ծռերի գործի հետ համեմատության մեջ, որի դեպքում զինված հարձակումն ուղղակի կապվում էր գործով անցնող մեղադրյալների հետ, որոնք բացի մեկից՝ ԱԺ պատգամավորների՝ անձնական երաշխավորությամբ խափանման միջոցի փոփոխության  արդյունքում ազատ արձակվեցին կալանքից, և կամ՝դիտարկենք  Շիրխանյանի հայտնի գործի հետ համեմատելով, ապա տրամաբանության մեջ չտեղավորվող պիտի համարվի Քոչարյանի խափանման միջոցը չփոխելու հարցը:

Այսինքն, Քոչարյանին կալանքի տակ պահելու հիմնավոր պատճառ, ըստ էության չկա ու եթե այս անգամ էլ կալանքը ուժի մեջ մնա, ապա որևէ կասկած չի մնա, որ Հայաստանի երկրորդ նախագահը պարզապես  քաղաքական հետապնդման զոհ է դառնում: Ուղղորդված հետապնդման: Առավել եւս եթե նկատի ունենանք իշխող քաղաքական ուժը ներկայացնող պատգամավորի այսօր տարածած կոչ-հայտարարությունը՝ Քոչարյանի խափանման միջոցի հնարավոր փոփոխությունը բացառելու համար դատարանին ստիպելու նպատակով բողոքի ակցա կազմակերպելու համար։

Աստված մի արասցե, որ այս համատեքստում  մեկ այլ՝  սողացող տագնապ  էլ  արդարացված լինի, որն ուղղակի անմիջականորեն Արցախի հարցի հետ է կապվում։

Հեղինակ` Մարինե Մինասյան