Փաստ ինֆո

«Արմեն Թավադյանը մինչ այս պահը որեւէ անգամ վարույթ իրականացնող մարմնից չի խուսափել»,- «Փաստինֆո»-ի հետ զրույցում ասաց «5-րդ» հեռուստաալիքի սեփականատեր Արմեն Թավադյանի պաշտպան Նարեկ Ալոյանը. «Ըստ Ոստիկանության ձեւակերպման` նա հրավիրվել է Ոստիկանության Նոր Նորքի բաժին, հրավերը ընդունել է, եւ ներկայացել»:

Նարեկ Ալոյանի խոսքով` Ռոբերտ Քոչարյանի եւ Արմեն Թավադյանի նկատմամբ իրականացվողը նույն գործելաոճն է. «Ամիսներ առաջ Ռոբերտ Քոչարյանը քննչական մարմին է հրավիրվում վկայի կարգավիճակով, նրա հետ` որպես վկայի, որեւէ գործողություն չի կատարվում, եւ մեղադրանք է առաջադրվում, ամիսներ անց Արմեն Թավադյանը, ով հանդիսանում է  «5-րդ» ալիքի սեփականատերը եւ Ռոբերտ Քոչարյանի աջակիցը, հրավիրվում է քննչական մարմին դարձյալ վկայի կարգավիճակով, դարձյալ այդ կարգավիճակով նրա հետ որեւէ գործողություն չի իրականացվում, եւ առաջադրվում է մեղադրանք, այս գործելաոճը չի համապատասխանում օրենսդրությանը, նույնն է եւ հիմք է տալիս ենթադրելու, որ սա քաղաքական հետապնդում է»:

Պաշտպանի խոսքով` իրենց քննչական մարմին ներկայանալու ծանուցում ստացել են այսօր` ժ. 12-ի սահմաններում. «Արմեն Թավադյանը ստացել է ծանուցագիր, որի համաձայն քննչական մարմին պետք է ներկայանար երեք ժամ անց,  մինչդեռ իրավակիրառ պրակտիկայում ընդունված է ծանուցագրեր ուղարկել` մի քանի օր առաջ, բայց ունենալով շատ կարճ ժամանակ` այնուամենայնիվ իմ ուղեկցությամբ ներկայացել է վարույթ իրականացնող մարմին»:

Ներկայանալուց հետո, ըստ պաշտպանի, պարզվել է, որ քննչական մարմինը գործողություն է իրականացնում տուժող կողմի հետ. «Մենք հարկադրված ենք եղել մեկ ժամ սպասել, թեեւ առնվազն 30 րոպե սպասելուց հետո կարող էինք դուրս գալ քննչական մարմնից ու ասել` նոր ծանուցագիր ուղարկեք, բայց այս դեպքում եւս սպասել ենք, ինչը, կարծում եմ, խոսում է այն մասին, որ չենք խուսափել վարույթն իրականացնող մարմին ներկայանալուց»:

Պաշտպանն ընդգծեց` վարույթն իրականացնող մարմինը որեւէ տեղեկություն չունի Արմեն Թավադյանի առողջական վիճակի վերաբերյալ: «Փաստինֆո»-ի այն հարցին, թե ինչ առողջական խնդիրներ ունի նա, Նարեկ Ալոյանը պատասխանեց, որ այս պահին նպատակահարմար չի գտնում խոսել այդ մասին. «Դրա վերաբերյալ ես կխոսեմ դատարանում, բայց հիմա կամ պետք է առաջնորդվենք, որ քննչական մարմիններին առհասարակ նման հարցեր չեն հետաքրքրում, կամ  պետք է գանք հետեւության, որ ուղղակի շտապողականություն են դրսեւորում, դրա համար էլ առողջական վիճակին ուշադրություն չեն դարձնում»,-ասա նա, եւ հավելեց. «Վարույթ իրականացնող մարմնին հայտնել ենք այդ մասին, սակայն դրա վերաբերյալ դիրքորոշում չեն արտահատել»:

Նարեկ Ալոյանը հիշեցրեց նաեւ` միջադեպին մասնակցել են մի խումբ քաղաքացիներ, որոնց մի մասը բացասական կարծիք է հնչեցրել Քոչարյանի մասին, մյուս մասը` դրական. «Այսինքն` եղել է բարձր տոներով կարծիքների փոխանակում: Հիմա քաղաքացիների մի մասի կարծիքի իրացումը որակվել է որպես խուլիգանություն, ուստի մեզ համար առնվազն տարակուսելի է, թե մյուս մասին, որը բացասական կարծիքներ էր հնչեցրել Քոչարյանի նկատմամբ, ինչու նույն ձեւաչափով մեղադրանք չի առաջադրվել խուլիգանություն կատարելու համար: Չէ՞ որ նրանց բղավոցների արդյունքում եւս ենթադրաբար պետք է խաթարված լիներ դատարանի բնականոն գործունեությունը»:

Մեր այն դիտարկմանը, թե առաջադրված մեղադրանքը շշով հարվածելուն է վերաբերում, եւ ոչ բնականոն ընթացքը խաթարելուն, պաշտպանն արձագանքեց. «Հարվածելը դնենք մի կողմ, որովհետեւ տեսականորեն հարված կատարած անձը գործի մասնակիցներից ընդամենը մեկն է, կարող էր հարվածը չլիներ, բայց էլի մեղադրանք լիներ, եւ հարց է առաջանում` ինչու Քոչարյանի վերաբերյալ դրական կարծիքներ հնչեցնող անձանց խումբը դարձավ մեղադրանքի թիրախ, տեսականորեն խուլիգանություն կատարող, իսկ բացասական կարծիք հնչեցնողների գործողությունները համարվեցին իրավաչափ»:

Ըստ Ալոյանի` եթե մյուս կողմին էլ մեղադրանք առաջադրելու լինեին, արդեն կառաջադրեին. «Այդ անձանցից մեկը, ով տվյալ գործողվ հանդիսանում է տուժող, մի քանի օր անց ոստիկաններին «թափթփուկ», «լկտի» անվանեց, ստացվում է` դա եւս իրավաչափ վարքագիծ է, իսկ դատարանում սեփական քաղաքական հայացքները արտահայտելը խուլիգանություն»:

Ինչ վերաբերում է միջնորդությանը` որպես խափանման միջոց կալանավորումն ընտրելու վերաբերյալ, Ալոյանը նշեց, որ դեռեւս տեղեկություն չկա. «Նիստ դեռեւս չի նշանակվել, եւ տեղեկություն չունենք, թե երբ կնշանակվի»,- «Փաստինֆո»-ին հայտնեց Արմեն Թավադյանի պաշտպան Նարեկ Ալոյանը:

Աղբյուր` Փաստինֆո