Փաստ ինֆո

Ընդդեմ Բարձրաստիճան անձանց էթիկայի հանձնաժողովի ՀՀ երրորդ նախագահ Սերժ Սարգսյանի թիկնազորի նախկին պետ Վաչագան Ղազարյանի հայցը բավարարելու մասին վարչական դատարանի որոշումը կարող է օգտագործվել նաեւ նրա նկատմամբ քրեական հետապնդումը դադարեցնելու հարցը բարձրացնելու համար։

«Փաստինֆո»-ն արդեն տեղեկացրել է, որ դատարանը պարտավորեցրել է հանձնաժողովին ոչնչացնել Վաչագան Ղազարյանի և նրա կնոջ 2017 թվականի տարեկան և 2018 թվականի պաշտոնի դադարեցման հայտարարագրերը և հօգուտ Վաչագան Ղազարյանին բռնագանձել 4000 դրամ` որպես դատական ծախս։

«Փաստինֆո»-ի հետ զրույցում Ղազարյանի ներկայացուցիչ Մհեր Հակոբյանը տեղեկացրեց, որ որոշումը դեռ չեն ստացել. «Դատական ակտն ամբողջությամբ դեռ չենք ստացել, այլ միայն եզրափակիչ մասը, բայց ես ենթադրում եմ, որ դատարանը մեր հիմնավորումների հիմքով է բավարարել հայցը, իսկ մենք պնդում էինք, որ Էթիկայի հանձնաժողովը ապօրինի կերպով է ձեռք բերել եւ հրապարակել այդ հայտարարագրերը»։

Մհեր Հակոբյանը հիշեցնում է՝ տասնութ թվականի ապրիլից հայտարարագիր ներկայացնելու պարտականությունը վերացել էր, բայց Վաչագան Ղազարյանն ինքնակամ ներկայացրել էր դրանք․ «Էթիկայի հանձնաժողովը չէր ասել, որ դա դադարել է լինել նրա պարտականությունը, եւ առանց տեղյակ պահելու ընդունել ու հրապարակել էր դրանք։ Այժմ դատարանը պարտավորեցրել է հանձնաժողովին ոչնչացնել այդ հայտարարագրերը»։

«Փաստինֆո»-ի այն հարցին՝ արդյո՞ք պատրաստվում են միջնորդություն ներկայացնել քրեական հետապնդումը դադարեցնելու համար, Մհեր Հակոբյանն ասաց, որ դա դեռ պարզ չէ․«Դեռ պետք է քննարկենք, ամեն դեպքում, մենք դա կօգտագործենք, ազդեցություն ունենալ-չունենալն արդեն վարույթ իրականացնող մարմնի տիրույթում է»։

Հիշեցնենք, որ Վաչագան Ղազարյանին մեղադրանք է առաջադրվել ՀՀ քրեական օրենսգրքի 314.3 հոդվածով և 310.1 հոդվածի 1-ին մասով, այն է՝ բարձրաստիճան պաշտոնատար անձանց էթիկայի հանձնաժողով ներկայացրած հայտարարագրերում իր ունեցած դրամական միջոցների իրական չափի մասին հայտարարագրման ենթակա տվյալները թաքցնելը եւ ապօրինի հարստանալը։

Աղբյուր` Փաստինֆո