Փաստ ինֆո

Այսօր Երևանի ընդհանուր իրավասության դատարան ներկայացել ՀՀ երրորդ նախագահի եղբայրը՝ Ալեքսանդր Սարգսյանը՝ որդու գործով հարցաքննվելու։ «Փաստինֆո»-ի թղթակիցը հայտնում է, որ Ալեքսանդր Սարգսյան, օգտվելով Սահմանադրությամբ ամրագրված իրավունքից,  չցանկացավ  վկայություն տալ, ինչպես  նաև պատասխանել դատարանի հարցերին։

Հիշեցնենք, որ Հայկ Սարգսյանը մեղադրվում է ընկերոջ նկատմամբ սպանության փորձի մեջ։ Ըստ մեղադրանքի՝ նա 2007 թ. ապրիլի 1-ին` ժամը 16:00-ի սահմաններում, իր բնակության վայրի` Երևան քաղաքի Թումանյան փողոցի 11շենքի 14 բնակարանի նկուղային հարկում գտնվող սենյակում, քննությամբ չպարզված հանգամանքներում ապօրինի ձեռք բերած և պահվող, հրազեն հանդիսացող «SIGSAUER» տեսակի «P266» մոդելի ատրճանակով Դավիթ Սիմոնյանին ապօրինաբար կյանքից զրկելու դիտավորությամբ կրակել է վերջինիս որովայնին, սակայն հանցագործությունն ավարտին չի հասցրել իր կամքից անկախ հանգամանքներում:

Մեղադրող դատախազը միջնորդություն ներկայացրեց՝  հրապարակելու՝ նախաքննության ընթացքում  Ալեքսանդր Սարգսյանի կողմից տրված ցուցմունքը։ Պաշտպանական կողմը չառարկեց և  նիստը նախագահող դատավոր Աննա Դանիբեկյանն բավարարեց միջնորդությունը։

Ըստ այդմ պարզ դարձավ, որ Ա.Սարգսյանը պնդել է, որ  իր որդին որևէ մեղավորություն չունի կատարված հանցագործության մեջ, և դեպքի մասին նա տեղեկացել է թաղամասի խոսակցություններից, ըստ որի` Արթուր Ղևոնդյանը կրակել է Դավիթ Սիմոնյանի վրա, իսկ այլ բան դեպքի հետ կապված չի կարող ասել։

Որպես վկա՝ դատարանում էր նաև 2007 թվ․-ին հարուցված քրեական գործը քննած քննիչը Խաչատուր Խաչատրյանը։ Ինչպես ավելի վաղ տեղեկացրել էինք՝ 2007 թվականի ապրիլի 1-ին Դավիթ Սիմոնյանը հրազենային վնասվածքով տեղափոխվել է թիվ 3 կլինիկական հիվանդանոց: Նույն օրը ոստիկանության Կենտրոնական բաժին էր ներկայացել քաղաքացի Ա.Ղևոնդյանը, ներկայացրել ատրճանակ և հայտնել, թե այն գտել է իրենց շենքին կից մանկապարտեզից դեպի նկուղ տանող աստիճանների մոտ, որի հետ անզգույշ վարվելու հետևանքով կրակել է՝ մարմնական վնասվածք պատճառելով ընկերոջը՝ Դավիթ Սիմոնյանին:

Սակայն 2007 թվականի մայիսի 28-ին ոստիկանության Կենտրոնականի քննչական բաժնում որոշում էր կայացվել փաստի առթիվ հարուցված քրեական գործի վարույթը կարճելու և Ա.Ղևոնդյանի նկատմամբ քրեական հետապնդում չիրականացնել` կողմերի հաշտության և բողոքի բացակայության հիմքով:

Տարիներ անց՝ 2018 թվականի հուլիսի 3-ին նոր երևան եկած հանգամանքներով պայմանավորված՝ Գլխավոր դատախազի կողմից վերացվել է նշված որոշումը, և քրեական գործը ուղարկվել ՀՀ քննչական կոմիտե` նախաքննություն կատարելու նպատակով, որի  ժամանակ էլ պարզվել էր, որ իրականում Սիմոնյանի ուղղությամբ կրակել է Հ.Սարգսյանը եւ ոչ թե Ղեւոնդյանը։

Քննիչը  հայտնեց, որ այն ժամանակ նա չի առնչվել այսօր հայտնի դարձած նոր հանգամանքներին։ Վկայի ցուցմունքից հետո Հայկ Սարգսյանի պաշտպանը միջնորդեց, որպեսզի հրապարակվեն նրա նախաքննական ցուցմունքները։ Դատարանը հետաձգեց միջնորդության քննարկումը եւ որոշեց վկային լրացուցիչ հարցաքննության հրավիրել։ Դահլիճ վերադառնալով՝  Խաչատուր Խաչատրյանն ասաց, որ գործի մանրամասներն այդքան էլ լավ չի հիշում և որևէ հստակ պատասխան չի կարող տալ։

Վկաների թվում էին նաև տուժող Արթուր Ղևոնդյանի մայրը՝ Լարիսա Առաքելյանը, ով պատմեց դեպքի մասին իրեն հայտնի մանրամասները և համաձայնեց տվյալներ փոխանցել որդու հետ կապվելու համար, որպեսզի դատարանը կարողանա վերջինիս հարցաքննության հրավիրել։

Հիշեցնենք, որ Հայկ Սարգսյանին մեղադրանք է առաջադրվել՝ սպանության փորձի և ապօրինի կերպով հրազեն ձեռք բերելու և պահելու համար՝ ՀՀ քրեական օրենսգրքի 34-104-րդ հոդվածի 1-ին և 235-րդ հոդվածի 1-ին մասերով։

Աղբյուր` Փաստինֆո