Փաստ ինֆո

«Ամենից հետաքրքիր է այն է, որ գործով 872 վկաներից ոչ մեկի ցուցմունքը կապված չէ 300.1 հոդվածի հետ»,- «Փաստինֆո»-ի հաղորդմամբ` դատարանի դահլիճում այս մասին հայտարարեց Ռոբերտ Քոչարյանը. «Մարդիկ պատմում են, թե ինչ է եղել. ոստիկանները իրենց հերթին են պատմում, թե ինչ են արել, զինվորականները` իրենց, ցուցարարները` իրենց»,-ասաց նա:

Ռոբերտ Քոչարյանը եզրակացրեց, որ այս քրեական գործը ավելի շատ առնչվում է Սահմանադրության հետ, քան քրեական օրենսգքրի. «Ի՞նչ արտակարգ դրություն, դրա մասին իմացել է միայն Արշակ Կարապետյա՞նը»:

Ռոբերտ Քոչարյանը հայտարարեց, որ անձեռմխելության մասով դիմելու են Սահմանադրական դատարան. «Մենք դիմելու ենք Սահմանադրական դատարան` 300.1 հոդվածի եւ անձեռնմխելիության հարցով, իհարկե, չենք կարող կանխատեսել, թե ինչպիսինն է լինելու ՍԴ որոշումը, բայց պատկերացրեք, մեր բողոքը բավարարելու դեպքում , ավելի խառնաշփոթ վիճակում ենք հայնտվելու»,-նշեց նա:

Անդրադառնալով մեղադրանքի որոշմանը` Ռոբերտ Քոչարյանն ընդգծեց, որ այն բոլոր կետերը, որոնք իրեն անհասկանալի էին, մնացել են անհասկանալի. «Երբ 1-ին անգամ ինձ մեղադրանք առաջադրվեց, ես ասացի, որ չեմ հասկանում, ու երբ քննիչին բացատրեցի, թե ինչը չեմ հասկանում, հասկացա, որ ինքն էլ չի հասկանում, այսինքն` ինչով է արտահատվել սահմանադրական կարգի տապալումը, կարո՞ղ եք ասել»:

Ռոբերտ Քոչարյանը ներկայացրեց մեկ դրվագ մեղադրանքից. «Ասվում է, որ ՊԲ շուրջ 1000 զինծառայող է տեղափոխվել Երեւան եւ տեղակայվել Կենտրոնական հավաքակայանում եւ այլ հատվածներում, եւ խոսվում է այդ ուժերի ապօրինի ներգրավման մասին»:

Քոչարյանը հարց ուղղեց դատախազներին. «Մեղադրականի այս դրվագի վերաբերյալ ես տա՞մ իմ պարզաբանումները, թե՞ դուք պատրաստ եք հրաժարվել գրվածից»:

Դատավորն ասաց, որ նման ընթացակարգ չկա, եւ Քոչարյանը կարող է ներկայացնել իր պարզաբանումը` իրացնելով իր իրավունքները:

Երեւան քաղաքի դատախազն էլ ասաց, որ նման հարց չի կարող քննարկվել. «Մեղադրանքից հրաժարվելու հարցեր չեն կարող քննարկվել, հատկանշական է, որ որեւէ անգամ մեր ցանկության մասին պաշտպանական կողմը չի հարցրել, ուստի, եթե Քոչարյանը գտնում է, որ պետք է արտահայտի, թող արտահայտի, բայց դեռ չլսած չենք կարող ասել, եթե լսենք ու առարկություններ կամ հայտարարություններ ունենանք, կներկայացնենք»,-ասաց դատախազը:

Ռոբերտ Քոչարյանն էլ հայտարարեց, որ պատրաստվում է ներկայացնել Մովսես Հակոբյանի ցուցմունքը: Դատախազներն առարկեցին, եւ ցուցմունքի հրապարակումը դեռեւս հետաձգվեց:

Հեղինակ` Միլենա Խաչիկյան