Փաստ ինֆո

«Պաշտպանների կողմից ներկայացվել են կոնտեքստից կտրված վերլուծություններ»,-«Փաստինֆո»-ի հաղորդմամբ` այս մասին դատարանի դահլիճում քիչ առաջ հայտարարեց Ռոբերտ Քոչարյանի գործով մեղադրանքը պաշտպանող Պետրոս Պետրոսյանը. «Պետք չէ մեղադրանքը ներկայացնել առանձին-առանձին եւ տալ սուբյեկտիվ մեկնաբանություններ»,-ասաց նա:

Հիշեցնենք, որ պաշտպանական կողմը միջնորդություն էր ներկայացրել Ռոբերտ Քոչարյանի ելույթից մի դրվագ, որը պարունակում էր պետական գաղտնիք, դռնփակ քննելու: Դատարանը բավարարել էր այդ միջնորդությունը, եւ ահա` քննությունից հետո, նիստը դարձյալ  շարունակվում է դռնբաց կարգով: Այժմ ելույթ է ունենում մեղադրող կողմը:

Անդրադառնաով այն տեսակետին, թե քննիչը նյութ է թաքցրել կամ փորձ է կատարվել այս փուլում թաքցնելու, դատախազն ընդգծեց, որ այդպիսի բան չկա. «Այդ նյութերը պարբերաբար փոփոխությունների են ենթարկվել, ինչը պայմանավորված է եղել այն հանգամանքով, որ նոր տեղեկություններ են ձեռք բերվել, եւ ես պաշտոնապես հայտարարում եմ, որ դռնփակ դատական նիստերի ընթացքում` քրեական գործով ապացույցները բավարար համարելով` ողջ նյութերը, բաղկացած 70 հատորներից, տրամադրվել են նրանց, հետեւաբար չէր կարող լինել որեւէ հանգամանք կամ պատճառ, որ մեղադրող կողմը դրանք թաքցներ»:

Պետրոս Պետրոսյանը շեշադրում արեց  մեկ այլ հանգամանքի վրա եւս. «Տպավորություն ստեղծվեց, թե վարույթ իրականացնող մարմինը, Սերժ Սարգսյանի ցուցմունքը ունենալով վաղ շրջանում,  թաքցրել է, բայց ես պնդում եմ, որ որ այդ ցումունքը ձեռք է բերվել 2019 փետրվարին եւ հենց փետրվարին էլ տրամադրվել է պաշտպանական կողմին»:

Դատախազի խոսքով` մեղադրանքը առաջադրելիս հաշվի են առել, որ 2008 թվականի փետրվարի 23-ին հրավիրվել է խորհրդակցություն հրամկազմի հետ, եւ այդ ժամանակ եղել է հանձնարարություն բանակը բերել մարտական պատրաստվածության վիճակի. «Պաշտպանական կողմը հարցնում է` դուք պատկերացնու՞մ եք` դա ինչ վիճակ է, այո, մենք պատկերացնում ենք եւ պնդում ենք, որ խնդիր է դրվել միջամտելու քաղաքական գործընթացներին, դրա վառ ապացույցն է խորհրդակցություից հետո ՊՆ-ի կողմից արձակված 0038 հրամանը»:

Դատախազը նշեց, որ Զինված ուժերը դեռես փետրվարի 23-ից ներգրացված են եղել այդ գործընթացների ճնշման գործում. «Եթե տեղի է ունեցել բանակի բնականոն օգտագործման գործընթաց, եւ եթե իրենք կատարել են իրենց ծառայողական խարտականությունները, ապա ինչո՞վ է պայմանավորված զինծառայողներին շուրջ 113 միլիոն ՀՀ դրամի վարձատրությունը»,-ասաց նա եւ հավելեց. «Այս քաղաքական գործընթացները ճնշելու համար մարտի 1-ին տեղի են ունեցել խաղաղ հավաքները իրականացնող անձանց Ազատության հրապարակից ցրելու գործողություններ»:

Հեղինակ` Միլենա Խաչիկյան