Փաստ ինֆո

Նշված հարցերը իրականում այս դատական նիստին պետք է չհասնեին, որովհետև դրանք նախկինում բոլոր ատյանների դատարաններում բարձրաձայնվել են:

Այսօր ՀՀ երկրորդ նախագահ Ռոբերտ Քոչարյանի և մյուսների գործով դատական նիստի ժամանակ, Երևանի ընդհանուր իրավասության դատարանում ասաց Քոչարյանի պաշտպան Հովհաննես Խուդոյանը՝ անդրադառնալով Քոչարյանի կալանքի տակ պահելու հարցին:
Նա նշեց, որ վերջնական առումով Վճռաբեկ դատարանը պետք է արդեն իսկ պատասխան տված լիներ բոլոր հարցերին և անհրաժեշտության դեպքում դիմած լիներ Սահմանադրական դատարան սահմանաիրավադրական խնդիրների բացահայտման համար:

‹‹Այս առումով ցանկանում եմ կարճ հայտարարել, որ Ձեր գործընկերները Ձեզ դրել են վատ դրության մեջ, որովհետև նախկինում իրենք պարտականություն ունեին անդրադառնալ այդ հարցերին, սակայն, կոպիտ ասած, այդ ամբողջ պատասխանատվության բեռը թողել են Ձեր վրա››,-ասաց Քոչարյանի պաշտպանը:

Դատավորն էլ իր հերթին ասաց, որ իր գործընկերները երբևէ միտումի չեն կարող գնալ: Խուդոյանը ընդգծեց՝ խոսքը միտման մասին չէ, ուղղակի բոլոր հարցերը իրենք արդեն պիտի պարզված լինեին, հիմա ստիպված պաշտպանները դրանք ներկայացնում են ընդհանուր իրավասության դատարանի դատավորի գնահատմանը:

Հեղինակ` Սոնա Գեւորգյան