Փաստ ինֆո

Նախորդ իշխանություններին  առանց մրցույթ հայտարարելու՝ մեկ աղբյուրից կատարված գնումների մեջ մեղադրող ներկա իշխանությունն այսօր, եթե նկատում եք, հենց այդ նույն մեղքերի մեջ է հայտնվել: Այդօրինակ փաստերի հետ արդեն իսկ առնչվել ենք և պետական վերահսկողական ծառայության առիթով, և Երևանի քաղաքապետարանում «Կամազ» մակնիշի մեքենաներին տրված նախապատվության համատեքստում, այն դեպքում, երբ այլ տարբերակ նույնպես գոյություն  է ունեցել:

Բնականաբար, բոլոր արտամրցութային, մեկ աղբյուրից կատարված գնումների հիմնական պատճառաբանություններից առաջինը ժամկետների սղությամբ պայմանավորելն է, ինչը և արել է «Փաստինֆո»-ի հարցմանն ի պատասխան ՀՀ կառավարությունը, երբ վերջինս հարց էր ուղղել Հայաստանում առաջին անգամ նշվող Քաղաքացու օրվա առթիվ ծախսված գումարների հասցեականության և նպատակայնության վերաբերյալ:

Կառավարությունից մայիսի 13-ին ստացված պատասխանը հետևյալն է՝ «ժամկետների սղության պատճառով հնարավոր չի եղել կազմակերպել մրցութային կարգով գնման գործընթաց:  Արդյունքում ստացվել է այնպես, որ թե՛ Երևանում, թե՛ մարզերում միջոցառումների կազմակերպման ողջ գործընթացը հանձն են առել սուբեկտիվ ընտրված մի քանի ընկերություն, նաեւ անհատ ձեռներեց, որոնց թվում կային դեռեւս մի քանի ամսվա պատմություն ունեցողներ։Կառավարությունից  ստացած գրավոր  պատասխանի համաձայն՝ Քաղաքացու օրվան նվիրված միջոցառումների կազմակերպման համար մարզերում ծախսվել է 83 428 110 դրամ, իսկ Երևանում՝ 25 020 000 դրամ։

Ըստ այդմ, գործ ունենք մի իրողության հետ /օրինակ՝ Գեղարքունիքի և Կոտայքի մարզերում/, երբ ասենք՝ միջոցառումները կազմակերպելու համար 8 մլնից ավելի դրամի պայմանագիր է կնքվել կոնկրետ Ա/Ձ-ի հետ, սակայն իրականում միջոցառումների կազմակերպումն իրականացրել է մեկ այլ կազմակերպություն՝ այդ մասին նաև ծանուցելով սոցցանցերում, իր ֆբ անձնական էջի միջոցով: Տվյալ  կազմակերպությանն ըստ կառավարության  պաշտոնական  պատասխանի՝ տրամադրվել է  8137000 դրամ՝ Կոտայքի մարզում միջոցառումներ կազմակերպելու համար: Արդ, ի՞նչով է բացատրվում այս խճողումը, ի վերջո, ո՞ր կազմակերպությունն  է ստանձնել միջոցառումների կազմակերպումը:  Ինչ է սա եթե ոչ կոռուպցիայի տիպիկ դրսեւորում։

Եվ կամ՝ կոնկրետ ի՞նչ միջոցառումներ են իրականացվել, ո՞րի վրա  ինչքա՞ն  գումար է ծախսվել: Չէ՞ որ պետբյուջեից հատկացված  այդ գումարները  նոր իշխանությունները պիտի այնքան  հստակ և նպատակային ծախսեին, որ կասկածի  տեղ չթողնեին մեր քաղաքացիներին: Մանավանդ, հենց տոնի օրն արդեն իսկ  շատ քաղաքացիներ բարձրաձայնեցին, որ ավելի հրատապ  խնդիրներ կարելի էր լուծել այդ գումարներով: Ի դեպ,  երբ կառավարությունն ասում է, թե՝   124 մլն-ից 108 448 110 դրամը հատկացվել է Երևանում և մարզերում միջոցառումները կազմակերպելուն, ըստ էության ոչինչ չի ասում:

Նախ, հետաքրքիր է՝ ո՞ր միջոցառումների մասին է խոսքը՝ մեր կրթամշակութային, արվեստի և սպորտային հաստատությունների սաների կողմից  զբոսայգիներում անցկացվող մրցույթների և շոու ծրագրերի՞: Ասենք, կարո՞ղ են նրանք կոնկրետ նշել, թե այս կամ այն երաժշտական, սպորտային հաստատությանն ինչքա՞ն գումար է հատկացվել: Թե՞ երեխաները կամավոր-պարտադիր տարբերակով եկել համերգ են տվել, բադմենտոնի, սուսերամարտի,  սթիիթբոլի, ցուցադրական ներկայացումներով հանդես եկել ու ցրվել: Կամ՝ նարդու, շաշկու և   շախմատի սպորտային նախաձեռնությունները որքանո՞վ են ծախսեր ենթադրել, մասնակիցներին գումա՞ր է  տրվել: Էլ չենք խոսում՝ մանկական տիկնիկային ներկայացումների, կավճանկարի, վերնիսաժում նկարների ցուցահանդեսների, և այլ հանրային միջոցառումների մասին, որոնք, քաղաքացու օրվա հայտարարված միջոցառումների ցանկում էին: Սրանց վրա որքա՞ն գումար է ծախսվել, կամ մեկ պարզագույն հարց ընդամենը՝ արդյո՞ք երեխաներին քաղաքացու օրվա շրջանակում հատկացված գումարներով են ,,ա,, կետից տեղափոխել ,,բ,, կետ և հակառակը…  Արդյո՞ք Քաղաքացու օրվա առիթով մարզային միջոցառումներին մասնակցող պետական պաշտոնյաների երթուդարձը նույնպես վերոհիշյալ գումարի շրջանակում է եղել, այս բաների մասին որևէ նշում չկա:  

 Ի վերջո, պատասխանում նշվում է, թե գումար է հատկացվել նաեւ «Հանրային կապերի մեդիա» ՊՈԱԿ-ին: Հարց է ծագում՝ ի՞նչու է գումար հատկացվել տվյալ ՊՈԱԿ-ին, եթե նա իր գործառույթն է իրականացրել՝ կազմակերպելով քաղաքացու օրվա միջոցառումների լուսաբանումը եւ ինչպես է դրսեւորվել այդ լուսաբանումը՝ հեռուստաընկերություններին են գումար տվել, թե՞ թեթերին ու կայքերին:    Նաև ասվում է, թե գումարներ են տրվել  միջոցառումները համակարգողներին, առանձին գումար է հատկացվել միջհամայնքային միջոցառումներին օժանդակելու  եւ անգամ մարզեր փոխադրումներ կազմակերպելու համար։

Իհարկե, կառավարությունը չի մանրամասնել թե ու՞մ են փոխադրել մարզեր, արդյոք այդ գումարները նախատեսվել են օրինակ, իշխանության տարբեր ներկայացուցիչների տեղափոխությունը կազմակերպելու համար։ Ասենք՝ տարբեր մարզեր ներկայացնող պատգամավորներին իրենց հայրենի քաղաք գնալու և խորոված կամ այլ համադամ խորտիկներ ճաշակելու  համար բենզինի և ճաշի- ընթրիքի գումա՞ր է դուրս գրվել, թե՞ երևանյան զբոսայգիներում  հանրության ներկայացուցիչների հետ ինքնաբուխ փոխշփման մասնակից լինելն էլ  փողով է եղել։ Ընդհանրապես, եթե ամեն բան հստակ ներկայացվեր, լրատվամիջոցները ենթադրությունների գիրկը չէին ընկնի։

Առաջին անգամ նշվող քաղաքացու օրվա ծախսերն իշխանությունների կողմից  շա՜տ մշուշապատ են ներկայացվում և տպավորությունն այնպիսին է, թե թղթի վրա մի բան է գրված, իսկ իրականում հիմնականում հանրային, քաղաքացիական նախաձեռնություններով, ինքնաբուխ զբոսանքի հաշվին   նշվեց՝ տեղ-տեղ հանրային, ժողովրդական  խորովածով ու այլ հյուրասիրություններով:

Այս առումով բազում հարցեր առկախ են մնում և որքան էլ ցանկանանք, հստակություն չենք տեսնում նաև 15 762 000 դրամանոց ծախսերի մեջ, որն ըստ կառավարության տեղեկատվության՝ օգտագործվել է գովազդային ծառայությունների, պոստեռների, բուկլտեների տպագրության,  Երևանից դեպի 10 մարզեր փոխադրման, Երևանում հրավառության, մարզերի համար հոլովակների ստեղծման և նմանատիպ այլ գովազդային միջոցառումների վրա: Հարցը բնավ հարապարակախոսական չէ՝բարաթ կա՞, եթե կա, ապա այն ենթադրում է կոնկրետ տողեր և անվանումներ: Այլապես՝ ցրելու և ջրելու, կամ իրավական լեզվով ասած՝ պետության միջոցները վատնելու տպավորություն է ստեղծվում:

Հեղինակ` Մարինե Մինասյան