Փաստ ինֆո

Ընդդեմ և հանուն Քոչարյանի ակցիաների մասնակիցները զրուցեցին միմյանց հետ: ՀՀ երկրորդ նախագահ Ռոբերտ Քոչարյանի աջակիցը հակառակ կողմի ներկայացուցչին խնդրեց՝ Քոչարյանի հասցեին որևէ վարկաբեկիչ արտահայտություն չանել, սակայն ընդդեմ Քոչարյանի ակցիայի մասնակիցը նշեց՝ ինքը միայն կարող է հորդորել իր կողմնակիցներին, կոչ անել, որ ՀՀ երկրորդ նախագահի աջակիցների հասցեին վիրավորական բառեր չասվեն:

‹‹Մարդիկ այնտեղ հայտնում են իրենց սուբյեկտիվ կարծիքը, ես ասում եմ՝ ոչ մի սեռական բնույթի հայհոյանք իրենք չեն հնչեցնելու, բայց ինչպես դուք ասում եք ‹‹ազատություն Ռոբերտ Քոչարյանին››, այդպես էլ այն կողմը ասում է ‹‹ցմահ դատապարտում››, դուք ասում եք ազգային հերոս է, իրենք ասենք ասում են մարդասպան է››,-ասաց ընդդեմ Քոչարյանի ակցիայի մասնակիցը:

Նրա խոսքով, սրանք սուբյեկտիվ կարծիքներ են, որոնց բախումը չպետք է բերի ազգային խնդրի:

Հանուն Քոչարյանի ակցիայի մասնակիցն էլ նշեց, որ ՀՀ երկրորդ նախագահի ազգային հերոս լինելը իրենք չեն տվել, դա պետականորեն է որոշված:

Կողմերի զրույցին միացավ նաև ոստիկանը և ասաց, որ եթե կարծիքների փոխանակում անեն 3 ժամ կխոսեն, հորդորեց քննարկման չվերածել խոսակցությունն ու օրենքը պահել, չկատարել այնպիսի գործողություններ, որոնք կխախտեն հավաքի խաղաղ, բնականոն ընթացքը:

Հիշեցնենք, որ արդեն չորրորդ օրն է, ինչ Երևանի ընդհանուր իրավասության դատարանում քննվում է Ռոբերտ Քոչարյանի և մյուսների գործով դատական նիստը: Գործի քննության առաջին օրը դատարանում միջադեպ տեղի ունեցավ քաղաքացիական ակտիվիստ Վարգես Գասպարի եւ  Քոչարյանի աջակիցների միջեւ.  Գասպարին պարզել էր մարտի 1-ի և հոկտեմբերի 27-ի վերաբերյալ ցուցապաստառ՝ բղավելով «Ռոբիկ մարդասպան», ինչը նրա ձեռքից խլեցին Քոչարյանի կողմնակիցները։ Իր խոսքով Քոչարյանի աջակիցները նաև իրեն շշով խփել էին:

Դեպքի առթիվ հարուցվել է քրեական գործ՝ խուլիգանության հոդվածի հատկանիշներով։

Նշենք նաև, որ Քոչարյանի պաշտպանական կողմը դատարանին էր ներկայացրել  Արցախի նախկին և ներկա նախագահների Արկադի Ղուկասյանի և Բակո Սահակյանի անձնական երաշխավորագրերը՝ Քոչարյանի խափանման միջոց կալանավորումը փոփոխելու վերաբերյալ: Դատարանը նշել էր, որ Սահակյանն ու Ղուկասյանը անձամբ պետք է ներկա գտնվեն դատական նիստին: Ամենայն հավանականությամբ նախագահները  կներկայանան դատական նիստին այսօր։

Հեղինակ` Սոնա Գեւորգյան