Փաստ ինֆո

Հայ Յեղափոխական Դաշնակցության Գերագույն մարմնի ներկայացուցիչ Իշխան Սաղաթելյանը ‹‹Փաստինֆո››-ի հետ զրույցում հերքեց մամուլում տարածված այն տեղեկությունը, որ ՀՅԴ ԳՄ-ն որոշել է այլևս առճակատման չգնալ նոր իշխանությունների հետ, քանի որ ժողովուրդը շարունակում է սատարել ներկայիս իշխանություններին:

‹‹Հերթական երևակայության արդյունքն է, մի քանի օր առաջ էլ գրել էին՝ հեղափոխություն են անում, հիմա էլ իրենք իրենց ասածը հերքում են››,-ասաց ԳՄ ներկայացուցիչը:

Տարածված տեղեկատվությունում ներկայացվում էր նաև ԳՄ ներկայացուցիչ Տարոն Տոնոյանի խոսքը, ով ասում է. «Ես կարծում եմ, որ այդ հակահեղափոխական ճանապարհով ով էլ որ ուզենա գնա, ինքը կտապալվի»:
‹‹Փաստինֆո››-ի հետ զրույցում, Սաղաթելյանն անդրադառնալով Տոնոյանի խոսքին, ասաց՝ ինքը զրուցել է գործընկերոջ հետ, և Տոնոյանի խոսքը կոնտեքստից կտրված է ներկայացվել. ‹‹Իրականում նա այլ բանի մասին է խոսել»,-ասաց ԳՄ ներկայացուցիչը:
Սաղաթելյանը նշեց, որ ՀՅԴ-ն իր դիրքորոշման ու կեցվածքի մասին դեռ 10 օր առաջ հանդես է եկել հայտարարությամբ:
Պատասխանելով հարցին՝ ՀՅԴ-ն պատրաստվու՞մ է դատախազություն դիմել 2018 թվականի հոկտեմբերին սահմանադրական կարգի տապալման համար, ԳՄ ներկայացուցիչն ասաց.

‹‹Այդ հարցը չենք քննարկել, ապագայում 1000 բան կարող է լինի։ Չգիտեմ կքննարկենք թե ոչ, բայց այս պահին նման նախաձեռնություն չունենք››,- ասաց Ի.Սաղաթելյանը:

Հիշեցնենք, որ շաբաթներ առաջ ՀՅԴ բյուրոյի ներկայացուցիչ Արմեն Ռուստամյանը հանդես էր եկել հայտարարությամբ` ասելով. «Այն, ինչ եղավ հոկտեմբերի 2-ին, ոչ այլ ինչ էր, քան սահմանադրական կարգի տապալման փորձ: Քննությունն էլ ժամանակի ընթացքում տեղի կունենա, ժամանակը կգա և բոլոր հարցերը կդնի իր տեղը»:

Հեղինակ` Սոնա Գեւորգյան