Փաստ ինֆո

«Հաշվի առնելով, որ երաշխավորություն ներկայացրած անձանցից մեկն էլ Արցախի գործող նախագահն է, ով բավականին խիտ գրաֆիկ ունի, խնդրում ենք հնարավորություն ընձեռել նիստը հետաձգել, որպեսզի երաշխավորները կարողանան դատարան ներկայանալ մայիսի 17-ին՝ օրվա 2-րդ կեսին»,- «Փաստինֆո»-ի հաղորդմամբ՝ այս մասին դատարանի դահլիճում քիչ առաջ հայտարարեց Քոչարյանի պաշտպան Հովհաննես Խուդոյանը։

Պաշտպանը նշեց նաեւ, որ եթե նշված ժամկետը դատարանը հեռակա ժամկետ համարի, ապա խնդրում են գնահատել հնարավորությունը՝ դա անել հեռակապի միջոցով։ Վերջին տարբերակը, սակայն, դատարանը բացառեց. «Հեռակապի միջոցով դատարանը հնարավորություն չի ունենա ՀՀ ՔՕ-ի 346-րդ հոդվածի համաձայն երաշխավորողին զգուշացնել պատասխանատվության մասին, այսինքն՝ անձը պետք է պարտադիր դատարանում ներկա լինի, եւ նախազգուշացման մասին ստորագրությամբ էլ հաստատի»,-ասաց դատավոր Դավիթ Գրիգորյանը։

Վերջինս հիշեցրեց, որ Քոչարյանի կալանքի ժամկետը լրանում է մայիսի 19-ին՝ կիրակի օրը, իսկ ամսի 18-ը շաբաթ օր է. «Շաբաթ ու կիրակի օրերին նիստ հրավիրելը գրեթե անհնար է, հնարավոր է՝ պարոն Քոչարյանի ներկայությունը չապահովվի այդ նիստին: Բացի դա, մենք դատական ակտ կայացնելու ժամանակ պետք է ունենանք, առնվազն 1-2 օր: Այդ իսկ պատճառով տեղյակ պահեք՝ գոնե վաղը ներկայանան, եթե հնարավորութուն ունեն»,- ասաց դատավորը:

Պաշտպան Արամ Օրբելյանն ասաց, որ կփորձի ճշտել:

Հեղինակ` Միլենա Խաչիկյան