Փաստ ինֆո

«300.1 հոդվածով նախատեսված արարքը կատարելու հիմնավոր կասկածը բացակայում է»,- դատարանի դահլիճում քիչ առաջ հայտարարեց Ռոբերտ Քոչարյանի պաշտպան Հայկ Ալումյանը. «Եթե նույնիսկ պրն Քոչարյանը ամբողջությամբ կատարած լիներ մեղադրանքում նշված արարքը, դա կնշանակեր սահմանադրական նորմի խախտում, այլ ոչ թե կարգի տապալում»:

Հայկ Ալումյանի խոսքով` բանակը իրականում կարող է օգտագործվել տեխնիկական որոշակի խնդիրների լուծման համար. «Մենք ձեզ այսօր դա ցույց կտանք, որպեսզի այդ կարգախոսը այլևս չօգտագործվի»:

Պաշտպանը նշեց, որ ըստ մեղադրանքի` Ռոբերտ Քոչարյանը մտադրություն է ունեցել ցանկացած գնով իշխանությունը փոխանցել Սերժ Սարգսյանին և օգտվելով այն հանգամանքից, որ հանդիսանում է Զինված ուժերի գլխավոր հրամանատարը, 2008 թվականի փետրվարի 23-ին բանակի բարձր անձանց հետ քննարկումներ ունենալով` հրահանգել է զորքերը բերել մարտական պատրաստության վիճակի` հայտարարելով արտակարգ դրության մասին. «Չկա հիմնավոր կասկած, որ պրն Քոչարյանը նման մտադրություն է ունեցել, նա առհասարակ չէր կարող նման մտադրություն ունենալ, քանի որ Սերժ Սարգսյանն այդ ժամանակ արդեն իսկ ընտրվել էր ՀՀ նախագահ, և ԿԸՀ-ի կողմից ընտրության արդյունքներն արդեն ամփոփված էին»,-ասաց Հայկ Ալումյանը:

Հեղինակ` Միլենա Խաչիկյան