Փաստ ինֆո

Երևանի ընդհանուր իրավասության դատարանում Ռոբերտ Քոչարյանի խափանման միջոցի քննության ժամանակ հրապարակվեցին Արշակ Կարապետյանի և Սերժ Սարգսյանի ցուցմունքներից որոշ դրվագներ։

ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանը, ինչպես արդեն նշել ենք, հայտարարել է, որ  Սերժ Սարգսյանն իր ցուցմունքում հերքել է Արշակ Կարապետյանի ցուցմունքը։

2008 թվականի փետրվարի 23-ին հրավիրված խորհրդակցության հանգամանքները ՀՀ երրորդ նախագահ Սերժ Սարգսյանն իր ցուցմունքում չի հիշել, քանի որ երկար ժամանակ է անցել, սակայն նշում է, որ խորհրդակցությունը հրավիրել է Ռոբերտ Քոչարյանը, որին մասնակցել է զինված ուժերի բարձրաստիճան սպայական կազմը։

«Ընդհանուր նպատակն է եղել զինված ուժերի ղեկավար կազմին նախազգուշացնել, որ ցուցարարների ղեկավարներն այդ պրոցեսների մեջ են ներգրավում զինված ուժերի սպաներին, որ նրանց է միացել փոխնախարարներից մեկը և բանակցություններ են վարում մյուս փոխնախարարի հետ, որ նա էլ միանա իրենց, ուստի պետք է թույլ չտալ և կասեցնել այդ ամենը։ Եվ դա առիթ հանդիսացավ, որ ՀՀ նախագահը իրավացիորեն, հանձնարարական տվեց, որ կամ դիմում են գրում և դուրս են գալիս զինված ուժերի համակարգից և շարունակում են մնալ Երկրապահում, կամ էլ դիմում են գրում և դուրս են գալիս Երկրապահի շարքերից և կատարում են իրենց ծառայողական պարտականությունները»,- ցուցմունքում հայտնել է Սերժ Սարգսյանը։

Հարցին ծանո՞թ է արդյոք Սերժ Սարգսյանը ՀՀ ՊՆ Միքայել Հարությունյանի 2008 թ.-ի փետրվարի 23-ին ստորագրած թիվ 0038 հույժ գաղտնի հրամանի բովանդակությանը ՀՀ երրորդ նախագահն ասել է, որ այդպիսի հրաման չի տեսել, ծանոթ չի եղել։ Ծանոթ է այնքանով, որքանով մամուլում հրապարակվել է վերջերս։ Սերժ Սարգսյանն ավելացրել է, որ աղոտ հիշում է, որ դեռևս 2009 թ. պաշտպանության նախարարության կապիտալ շինարարության վարչության պետ Արմեն Սարգսյանը դատապարտվել է հիշյալ հրամանից քաղվածք հրապարակելու համար։ ՀՀ նախկին նախագահը հիշում է, որ այդ մասին խոսում էր նաև փաստահավաք խումբը, - «Սակայն այդ ժամանակ նշված հրամանն իմ ուշադրությանն առանձնապես չի արժանացել, որ մտածեմ, թե դա որևէ կապ ունի 2008 թ. հետընտրական իրադարձությունների հետ»։

Թե ինչն է հանդիսացել ՀՀ Զինված ուժերը զորանոցային վիճակի բերելու նպատակը և դրանով ինչ խնդիրներ էին լուծվում, Սերժ Սարգսյանն իր ցուցմունքում ասել է, - «Ինչպես նախկինում նշեցի, նույն իրավիճակում, ես նույնպես զինված ուժերը կբերեի զորանոցային վիճակի։ Նշեմ նաև, որ հրապարակված քաղվածքում նշված էր զինված ուժերը զորանոցային վիճակի բերելու մասին, ուստի և այն ինձ համար որևէ կասկածի տեղիք չի տվել։ Դա նորմալ գործընթաց է զինված ուժերում»։

Խոսելով այն մասին, թե ինչու էր որոշվել արտակարգ դրություն հայտարարելուց հետո այդ ռեժիմի ապահովումը վերապահել նաև ՀՀ պաշտպանության նախարարությանը այն դեպքում, երբ դադարել էր նրանց ամենից անհանգստացնող իրավիճակի գոյությունը՝  «Երկրապահի» բողոքողների կողմ ներքաշումը, Սերժ Սարգսյանն իր ցուցմունքում  պատասխանել է, - «նախ նշեմ, որ վտանգի աղբյուրը եղել է ոչ միայն երկրապահ կամավորական միության կազմում ընդգրկված գործող սպաների առկայությունը, այլ նաև առանձին զինվորականներ և ստորաբաժանումներ։ Սկսենք նրանով, որ Մանվել Գրիգորյանի տուն գնալով, վտանգը չէր վերանում, հո երկրապահը չի սկսվում և  վերջանում Մանվել Գրիգորյանով։ Բացի դրանից զորանոցային վիճակ հայտարարելը նաև կանխարգելիչ միջոց էր»։

Աղբյուր` Փաստինֆո