Փաստ ինֆո

Ռոբերտ Քոչարյանի խափանման միջոցի հարցի քննության ժամանակ Ռոբերտ Քոչարյանի պաշտպանական խմբի ներկայացրած՝  Քոչարյանին կալանքից ազատելու վերաբերյալ Արցախի նախկին նախագահ Արկադի Ղուկասյանի ու գործող նախագահ Բակո Սահակյանի երաշխավորական նամակը չգիտես ինչու  շոկային վիճակ է առաջացրել որոշ շրջանակներում: Ի դեպ, հանրային հնչեղություն ունեցող անձանց խափանման միջոցի փոփոխության փաստերի   միայն վերջին շրջանում մեր հասարակությունը բազմիցս է  ականատես եղել:Հիշենք թեկուզ  հանրային հնչեղություն ունեցող Սասնա Ծռերի  դատավարությունը, որի ընթացքում ԱԺ պատգամավորների՝ անձնական երաշխավորությամբ խափանման միջոցի փոփոխության  արդյունքում գործով անցնող տարբեր  մեղադրյալներ ազատ արձակվեցին կալանքից:

Բնականաբար, այս նույն ընթացակարգով էլ դիմել են Բակո Սահակյանն ու Արկադի Ղուկասյանը՝ անձամբ պատասխանատու դառնալով իրենց դիմումի և երաշխավորության համար: Թվում է  տարօրինակ չպետք է լիներ, երբ օգտվելով քրեաիրավական համընդհանուր նորմերից  Արցախի Հանրապետության առաջին և ՀՀ երկրորդ նախագահ Ռոբերտ Քոչարյանի նկատմամբ որպես խափանման միջոց կալանավորումը դադարեցնելու համար երաշխավորում են Արցախի Հանրապետության երկրորդ և ներկա նախագահները՝ վստահեցնելով, որ  Ռ. Քոչարյանը  կդրսևորի պատշաճ վարքագիծ, չի խոչընդոտի գործի քննությանը, չի խուսափի վարույթ իրականացնող մարմին ներկայանալուց, չի կատարի Քրեական օրենսգրքով չթույլատրված արարք:

Ձևակերպումները հստակ են։ Ավելին՝ բարձրաստիճան պաշտոնյաները պատրաստ են անձամբ ներկայանալ դատարան՝ նաև իրենց ստորագրություններով վերստին պնդելով իրենց երաշխավորությունը:

Այս համատեքստում ավելի քան տարակուսելի է հատկապես փորձառու փաստաբան, Մարտի 1-ի գործով տուժողների շահերի ներկայացուցիչ,  առնվազն մինչև վերջերս Սահմանադրական դատարանի դատավորի թափուր պաշտոնի   հավակնորդ Վահե Գրիգորյանի  տագնապներն ու գնահատականները: Ընդ որում, հետաքրքիրն այն է, որ վերջինս լրագրողի հետ  զրույցի ընթացքում իրավագիտակցության դասեր է փորձում տալ Արկադի Ղուկասյանին և Բակո Սահակյանին, այն համատեքստում, թե նրանք խորապես չեն գիտակցում, թե «ինչ ասել է երաշխավորել  կալանքը փոխելու համար և կամ գուցե մտածում են, թե մի թղթի կտոր է, կստորագրեն ու վերջ»: Ավելի առաջ գնալով Վահե Գրիգորյանը շատ վտանգավոր մտքեր է հայտնում՝  փորձելով  Հայաստան-Արցախ հարաբերություններում հակադրություններ փնտրել, այն մտայնությամբ, թե «այդ երաշխավորությունը ոչ այլ ինչ է, քան իր հետագա հարաբերությունները տանել դնել այն անձի ոտքերի տակ, որն այս պահին մեղադրյալ է»։

Լսում ես ու մտածում՝ այս մարդը, որ իրավական ոլորտի հարգված մասնագետի համարում ունի, գիտակցու՞մ  է արդյոք «օրենքի առաջ բոլորը հավասար են» հիմնարար դրույթը, երբ իրավական աքսիոմատիկ ճշմարտություններն անգամ փորձ է անում  օգտագործել որպես հակաքարոզչություն՝ ընդդեմ երկրորդ նախագահի` չգիտակցելով որ լինելով փաստաբան և մշտապես առնչվելով երաշխավորության ինստիտուտի հետ՝  այս կերպ  ստվեր է գցում և ընդհուպ զրոյացնում  նաև տվյալ ինստիտուտը:

Վստահ ենք, որ գիտակցում է, պարզապես ինչպես նախաքննության փուլում, այնպես էլ հիմա շարունակում է իր ծառայությունները մատուցել՝ վարույթն իրականացնող մարմնին։ Թվում էր թե՝ լինելով տուժողների շահերի ներկայացուցիչը պետք է որ շահագրգռված լիներ իրականության բացահայտմամբ, իր վստահորդների հարազատների սպանության իրական հանգամանքների պարզաբանմամբ, բայց ընդամենը նպաստում է ՀՀ երկրորդ նախագահին կալանքի տակ պահելու ոմանց մտադրության իրականացմանը։

Ավելին՝ լինելով որպես տուժողի շահերի ներկայացուցիչ նա առաջինը պետք է շահագրգռված լիներ, որ օրենքի որեւէ տառ չխախտվեր եւ տեղի ունենար արդարադատություն, բայց միջազգային իրավունքի մասնագետի  համարում ունեցող իրավաբանն այսօր լռում է անգամ ՍԴ-ի աղմկահարույց որոշումից հետո, որով փաստվեց, որ պաշտոնաթող նախագահի իրավունքները խախտվել են եւ նա փաստացի կալանքի տակ է մնում ապօրինի, իսկ Արցախի նախագահների բարի կամքի դրսեւորումը կարծես ուղղակի խառնել են իշխանությունների խաղաքարտերը։  Նրանց երաշխավորագրի, ՍԴ-ի որոշման պայմաններում Քոչարյանին կալանքի տակ պահելը կվկայի վերջինիս ամեն գնով կալանքի տակ պահելու իշխանությունների ձգտման մասին, դե իսկ Վահե Գրիգորյանն էլ շտապում է նոր «փաստարկներ» ստեղծել իշխանավորների համար:

Հեղինակ` Մարինե Մինասյան