Փաստ ինֆո

«Ոչ ոք իրավունք չունի ասել` «Մարտի 1»-ի գործն ամբողջությամբ բացահայտված է, մինչեւ բոլոր զոհերի մահվան հանգամանքները հայտնի չլինեն»,-այս մասին այսօրվա նիստից հետո դատարանի բակում հայտարարեց Ռոբերտ Քոչարյանի պաշտպան Հայկ Ալումյանը. «Մինչեւ հիմա հայտնի չեն, թե ովքեր են զոհվածների մահվան համար մեղավորները եւ որ կողմից, բացառությամբ «չերյոմուխայից» զոհված անձանց դեպքերի»,-ասաց նա:

Վերջինիս խոսքով` խափանման միջոցի հարցի քննության ժամանակ գլխավոր հարցը հիմնավոր կասկածի առկայության կամ բացակայության հարցն է. «Այսինքն` քննարկվում է` գոնե այդ նվազագույն շեմի կասկածներն առկա են թե ոչ, բայց եղած ապացույցները անգամ այդ նվազագույն շեմը չեն հաղթահարում»,-նշեց նա:

Ինչ վերաբերում է դատավորի կաշկանդված լինել-չլինելուն, պաշտպանը պնդեց, որ այն դատավորը, ում նկատմամբ ճնշում է գործադրվում, ամենաքիչն է հակված դա ասելու. «Եթե նույնիսկ նրան հատուկ ոչ ոք ոչինչ ասած էլ չլինի, հնարավոր չի, որ նա այդ ճնշումը իր վրա չզգա, եւ դրա վառ ապացույն այն է, թե քանի դատավոր է կարողացել ինքնաբացարկով այս գործը իր վրայից գցել»:

ՍԴ նախագահին դատարան հրավիրելու միջնորդության մերժումն էլ Հայկ Ալումյանը պայմանավորեց դատարան կանչման ենթակա անձի ով լինելով. «Ցանկացած դատավորի որոշման վրա կազդեր այդ անձի, տվյալ դեպքում` Գագիկ Հարությունյանի ով լինելը եւ դերը` դատական համակարգում»,-ասաց նա:

Մանրամասները` «Փաստինֆո»-ի տեսանյութում

Հեղինակ` Միլենա Խաչիկյան