Փաստ ինֆո

«Ալ. Սպենդիարյանի անվան օպերայի և բալետի ազգային ակադեմիական թատրոնի աջակցման» հիմնադրամն արձագանքել է հիմնադրում արձանագրված առերեւույթ չարաշահումների վերաբերյալ «Փաստինֆո»-ի հրապարակմանը, որտեղ թատրոնի աշխատակիցները ներկայացրել էին մի շարք խախտումների վերաբերյալ իրենց տեղեկությունները։ Նկատի ունենալով բարձրացված հարցի վերաբերյալ մյուս կողմի՝ պարզաբանում կամ հերքում տալու գործող օրենսդրությամբ երաշխավորված իրավունքը՝ կից ներկայացնում ենք հիմնադրամի ուղարկած հերքումը։

«ՀԵՐՔՈՒՄ

Փաստինֆո իրավական լուրերի www.pastinfo.am ինտերնետային կայքում  2019թ. ապրիլի 22-ին հրապարակվել է «Կոնստանտին Օրբելյանը թատրոնը «մաքրել է գումար գողացողներից» հոդվածը՝ հեղինակ Հասմիկ Կոշկարյան:

Հոդվածում տրված տեղեկությունները արատավորում են «Ալ. Սպենդիարյանի անվան օպերայի և բալետի ազգային ակադեմիական թատրոնի աջակցման» հիմնադրամի, ինչպես նաև վերջինիս տնօրեն Շմավոն Գրիգորյանի պատիվը, արժանապատվությունը և գործարար համբավը, դրանք զրպարտություն են:

Հրապարակման մեջ խախտված են բարեխիղճ և պատասխանատու լրագրության՝ բազմակարծության և հավասարակշռված լրատվության տրամադրման սկզբունքը։

«Ալ. Սպենդիարյանի անվան օպերայի և բալետի ազգային ակադեմիական թատրոնի աջակցման» հիմնադրամի, ինչպես նաև վերջինիս տնօրեն Շմավոն Գրիգորյանի հասցեին հնչած հայտարարությունները զուգակցվել է այնպիսի արտահայտություններով, տեսակետներով և կարծիքներով, որոնք արատավորում են անձի պատիվը և արժանապատվությունը: Նման սուտ հայտարարությունների համար պետք է պատասխանատվություն ստանձնել:

Հաշվի առնելով ՀՀ քաղաքացիական օրենսգրքի 1087.1-րդ հոդվածով, ինչպես նաև «Զանգվածային լրատվության մասին» ՀՀ օրենքի 8-րդ հոդվածով սահմանված պահանջները՝ խնդրում ենք Փաստինֆո իրավական լուրերի www.pastinfo.am ինտերնետային կայքում  երևացող վայրում հրապարակել հերքում այն մասին, որ.

 «կայքում  2019թ. ապրիլի 22-ին հրապարակվել է «Կոնստանտին Օրբելյանը թատրոնը «մաքրել է գումար գողացողներից» հոդվածը, որում «Ալ. Սպենդիարյանի անվան օպերայի և բալետի ազգային ակադեմիական թատրոնի աջակցման» հիմնադրամի, ինչպես նաև վերջինիս տնօրեն Շմավոն Գրիգորյանի վերաբեյալ հայտնած տեղեկությունները իրականությանը չեն համապատասխանում:

Ավելին լրատվամիջոցի լրագրողը արդեն իսկ իր տարիների գործունեության ընթացքում մեծ աշխատանք կատարած Հիմադրամին և վերջինիս տնօրենին ուղղակիորեն մեղադրում է հանցագործության կատարման մեջ, չունենալով որևէ փաստ: Սա այն դեպքում, որ Հիմնադրամը տարիների անբասիր աշխատանքը ապացուցել է իր գործունեության թափանցիկությամբ, ինչի անհերքելի հաստատումն է միջազգային հեղինակավոր աուդիտորական ընկերության՝ KPMG-ի (Քեյ-Փի-ԵՄ-ՋԻ) կողմից տրված ֆինանսական ծախսերի գերազանց գնահատականը:

Առավել ևս, որ լրագրողը որևէ իրավունք չունի առանց փաստի տեղեկեություն հայտնել մի հիմնադրամի մասին, որի վերաբերյալ նա որևէ տեղեկություն չունի, և նույիսկ չի փորձել ստանալ հիմնադրամի գործունեության մասին իրական տեղեկատվություն»:

Ապագայում խորհուրդ ենք տալիս Հիմնադրամի վերաբերյալ տեղեկություններ ստանալուց առաջ դրանք ճշտել և հրապարակել հակափաստարկները»:

«Փաստինֆո»-ն կշարունակի թեմային անդրադառնալ։ Նշենք, որ ՀՀ գլխավոր դատախազությունը եւս ստուգումներ է սկսել՝ մամուլի հրապարակումների հիման վրա։

Աղբյուր` Փաստինֆո