Փաստ ինֆո

«Իրավաբան» ՍՊԸ-ի հիմնադիր-տնօրեն Ներսես Խաչատրյանը, ով գտնվում է Նուբարաշեն քրեակատարողական հիմնարկում, ժամանակավորապես դադարեցրել է հացադուլը։ Այս մասին «Փաստինֆո»-ն տեղեկացավ Ներսես Խաչատրյանի կնոջից՝ Գայանե Դավթյանից. «Այս պահին փաստաբանների եւ մեր հորդորներով հացադուլը ժամանակավորապես դադարեցրել է»։

Տիկին Դավթյանը նշեց նաեւ, որ մայիսի 16-ին պատգամավորների անձնական երաշխավորության հետ կապված նիստ է լինելու։ Այլ մանրամասներ այս պահին նրան հայտնի չեն։

Հիշեցնենք, որ մայիսի 6-ին «Իրավաբան» ՍՊԸ-ի հիմնադիր-տնօրեն Ներսես Խաչատրյանը պաշտոնապես հացադուլ էր հայտարարել, իսկ մայիսի 10-ից պատրաստվում էր նաև ջրադուլ անել։ «Փաստինֆո»-ն այդ մասին նամակ էր ստացել, ըստ որի՝ կալանավորված իրավաբանն այդպիսով իր բողոքի ձայնն է բարձրացնում դեպի պետական բարձրաստիճան պաշտոնյաները, մասնավորապես՝ պահանջում է հանդիպում ՀՀ կառավարության վարչապետի և ՀՀ Գլխավոր դատախազի հետ:

Քրեակատարողական ծառայությա հանրային կապերի բաժնի պետ Նոնա Նավիկյանն էլ «Փաստինֆո»-ին հայտնեց, որ Ներսես Խաչատրյանը հացադուլը դադարեցրել է մայիսի 7-ին. «Ներսես Խաչատրյանին այցելել են իր փաստաբանները եւ Մարդու իրավունքների պաշտպանի գրասենյակից»,- փոխանցեց նա։

Ավելի վաղ հայտնել ենք, որ Ներսես Խաչատրյանը նախնական կալանքի տակ է գտնվում 2019 թվականի մարտի 12-ից։ Նա մեղադրվում է ՀՀ քրեական օրենսգրքի 178-րդ հոդվածի հատկանիշներով՝ առանձնապես խոշոր չափերով խարդախության համար։

Հեղինակ` Միլենա Խաչիկյան