Փաստ ինֆո

2018թ.-ի քրեական հետապնդման ենթարկված գործող դատախազ չի եղել: 2017թ.-ին քրեական հետապնդման է ենթարկվել մեկ գործող դատախազ, 2018-ին կատարած առերևույթ հանցագործության համար գարծով դատաքննությունը ընթացքի մեջ է: Այսօր Ազգային ժողովում ասաց ՀՀ գլխավոր դատախազ Արթուր Դավթյանը՝ պատասխանելով «Իմ քայլը» խմբակցության պատգամավոր Էդգար Առաքելյանի հարցին, թե մեղադրանք առաջադրված 470 պաշտոնատար անձանցից քանի՞սն են ներկայացնում դատախազական համակարգը և դատախազը ինչպե՞ս է պատկերացնում դատախազությունում կոռուպցիայի դեմ պայքարը:

Դավթյանը նշեց, որ առաջին իսկ պահից կարևորել է կոռուպցիայի դեմ պայքարի հարցը և դրա համար  մեխանիզմներ մշակվել են:

«Դրանք իրավական առումով հանդիսացել են հետևյալները, որ վերահսկողական այնպիսի առարկայական ընթացակարգեր ենք սահմանել, որ հնարավոր լինի վերահսկող կամ վերադաս դատախազների կողմից ևս դիտարկել ստորադաս դատարանի ներկայացրած ակտերն ու հնարավոր կողմնակալ մոտեցումները ժամ առաջ բացահայտել. առաջին հերթին դրա պատճառը վերացնել, երկրորդ հերթին պատասխանատվության հարցը բարձրացնել»,-ասաց ՀՀ գլխավոր դատախազը:

Նա նշեց նաև, որ պակաս կարևոր չի համարում այս ուղղությամբ ձեռնարկած բարոյական քայլերը և ընդգծեց, որ ամենակարևորը բարոյահոգեբանական այն մթնոլորտնի ձևավորումն է, որ պետք է լինի զրո հանդուրժողականություն կոռուպցիայի նկատմամբ:

Դատախազն ասաց, որ ամբողջ համակարգի առումով կարող է ասել՝ հաջողվել է դատախազությունում ձևավորել այդ մթնոլորտը:

«Իմ քայլը» խմբակցության պատգամավորն էլ արձագանքելով հարցրեց՝ փաստորեն հանրային գիտակցության մեջ խորհրդային ժամանակաշրջանից ձևավորված այն համոզմունքը, որ դատախազները  հասարակության ամենակոռումպացված, ժողովրդական լեզվով ասած՝ «տռզած» պաշտոնյաներն են, դա համարենք, որ այլևս չի՞ համապատասխանում իրականությանը, մենք դա հաղթահարե՞լ ենք, ստացվում է՝ այլևս սրբե՞ր են դատախազները:

Դավթյանն էլ պատասխանեց, որ ինքը չի կարծում, թե մարդիկ 2 տեսակի են լինում՝ սրբեր և կոռուպցիոներներ:

«Սրբեր երկրի վրա ինձ հայտնի չեն, այդ թվում դատախազներ, բայց հանրային գիտակցություն հետ կապված ես՝ որպես գլխավոր դատախազ, պաշտոնապես այստեղից ասում եմ, դա բացառված է այսօրվա դատախազական համակարգում: Առաջինը ասում եմ իմ կենցաղով, իմ ամենօրյա օրինակով»,-ասաց ՀՀ գլխավոր դատախազը:

Հեղինակ` Սոնա Գեւորգյան